«سعد» و«شيبة» مستقبل الأغنية الشعبية.. أبرز تصريحات عبد الباسط حمودة

يصادف اليوم 5 يناير عيد ميلاد الفنان الشعبي عبد الباسط حمودة، الذي ولد عام 1955 في محافظة المنوفية، ويعتبر من أقدم وأشهر المطربين الشعبيين في مصر والوطن العربي.

فيما يلي يقدم “الدستور” أبرز تصريحاته التي أثار بها الجدل الفترة الأخيرة.

المهرجانات الشعبية

قال عبد الباسط حمودة إنه يرفض الهجوم الذي يتعرض له مؤديين المهرجانات، لأنه نوع من أنواع الغناء من يريد يسمعه يتفضل ومن لا يريد أن يسمعهم يغلق أغانيهم أو يسد أذنه.

مهاجمين المهرجانات أعداء النجاح

وصف كل من يهاجم مؤدي المهرجانات بأنهم أعداء النجاح وقال: "دول أعداء النجاح، إيه حكاية الغيرة دي، هو يعني بياخد رزقك، ما تسيب الملك للمالك، وخليها على الله، مفيش حد هياخد رزقك ليه خايف منه، دول أنا بشوفهم أعداء النجاح، هي الكلمة دي بتلخص كل حاجة".

لماذا لا يحب الفنانين الحاليين بعضهم؟

وتساءل الفنان عبد الباسط حمودة في برنامج واحد من الناس مع الإعلامى عمرو الليثي عن سبب كره الفنانين الحاليين لبعضهم البعض وقال: "ليه مبنحبش بعض زي ما كنت بعمل أنا وحسن الأسمر وأحمد عدوية وغيرهم؟ عشان كده كنا محبوبين جدًا من الناس".

الشارع اللي علمني وعملني

قال في نفس الحلقة أيضًا عن عدم دخوله المدارس: "أنا اتعلمت فى الشارع ومتعلمتش في مدرسة ولا في معهد وتعبت عشان اوصل للناس".

الأغنية الشعبية فارضة نفسها طول الوقت

وصرح في أحد اللقاءات التلفزيونية قائلًا: "الناس حالتهم مختلفة بين السعادة والشجن وأنا حريص على غناء كل الألوان عشان اعرف اوصل للناس، خصوصًا أن الأغنية الشعبية فارضة نفسها طول الوقت ومماتتش". 

مستقبل الأغنية الشعبية

وقال مع الإعلامية بسمة وهبة في برنامج العرافة: "طارق الشيخ امتداد ليا، وأحمد شيبة وأحمد سعد أصواتهم تحفة وهما دول مستقبل الأغنية الشعبية لأن اغانيهم حلوة والكلمة الحلوة بتعلق مع الناس".

عمر كمال وحمو بيكا

وقال: "عمر كمال وحمو بيكا مينفعش نقول عليهم مطربين شعبيين، حمو بيكا بياكل عيش وهو بيقول كده، وعمر كمال أنا اللي وجهته في الحاجات الصح وهو دماغه كبيرة وزكي، بعيدًا عن الألفاظ الخارجة في أغانيه والألوان الغريبة دي، هو  بيغني لعبد الحليم وشاطر وسلملي نفسه وقالي اعمل اللي انت شايفه، وأدينا بدأنا بأغنية ضيعنا ولسة هتشوفوا اللي جاي منه.

خالي توفيق الدقن

وقال في برنامج العرافة: "أنا من محافظة المنوفية مركز شبين الكوم بركة السبع، والشارع بتاعنا كله من عائلة توفيق الدقن، جدى سيد الدقن وأمي أيضًا من عائلة الدقن، ومدافننا واحدة علشان كده قولت إنه خالي، ومش شرط إنه خالي في الحقيقة".

أنا بأيد هاني شاكر

وقال في برنامج الإعلامي عمرو الليثي: "الأستاذ هاني شاكر عنده حق، ومغلطش لما قال إنه يعمل امتحان واللي ينجح يبقى تمام واللي مش بيعرف يغني يعمل إيه يعني، وأنا وجيلي من زمان بنروح للمصنفات ويشوفوا كلمات الأغنية قبل ما أغنيها، ولو فيه جملة مش هتنفع بيعترضوا وأغيرها، هاني شاكر مش عاوز لفظ خارج، ومنقدرش نلومه في حاجة وهو ممنعش شخص عن أنه ياكل عيش بس المهم أن المطرب يقول الكلمة الحلوة، وهاني شاكر قيمة وفنان كبير وفاهم كل حاجة، وكلام ده كله ميمنعش إن في مطربين في المهرجانات بتغنى كويس أوي".

حسن شاكوش متربي علي إيدي

وقال مع عمرو الليثي عن حسن شاكوش: “شاكوش متربي على إيدي، وهو حبيبي أوي أوي، وبيقلدني في الغناء بس بيزعق كتير، هو متأثر بيا”.