صنداونز

تاني! وقعنا مع صنداونز تاني! قصدي رابع مرة على التوالي؟
عمومًا، النادي الجنوب إفريقي تاريخه مع الأهلي معروف ومحفوظ، ومين ينسى، ومين يقدر فـ يوم ينسى؟ معظمها إن لم يكن كلها لقاءات تاريخية، بـ غض البصر حملت الأفراح لـ مين.
كذلك مع الزمالك، معروفة ومحفوظة.
إنما يا إخوانا ممثل جنوب إفريقيا الأشهر ليه مواجهة مع نادي مصري تالت، محدش تقريبا بـ يذكرها، هو نادي حرس الحدود، تاريخ الحرس كله في إفريقيا أندر ريتيد جدا، ربما لـ إنه مكسبش ولا لقب، أو لـ إن كل مشاركاته في الكونفيدرالية، أو لـ إنه بـ بساطة حرس الحدود، لا هو أهلي ولا زمالك.
المهم، المواجهة دي كانت سنة 2008، وقتها كان صنداونز في دوري الأبطال، وتجاوز الدورين التمهيديين بـ سهولة بـ الفوز رايح جي في كل دور. ثم قابل الهلال السوداني في تمن النهائي، وكل فريق منهم فاز على ملعبه، لكن الهلال كسب 4/2، وصنداونز 1/ صفر بس، فـ اضطر يحول مسار ويدخل الكونفيدرالية.
كان وقتها التحويل من دور الـ16، والحرس كان شق طريقه، ووصل لـالمرحلة دي من الكونفيدرالية، واتقابلوا في جنوب إفريقيا أولًا، وصنداونز كسب 1/ صفر، وهنا كان الحرس عنده مهمة انتحارية، خصوصًا بعد ما أعلن غياب أهم اتنين عنده: أحمد عيد عبدالملك لـ الإيقاف، وأحمد عبد الغني لـ الإصابة.
ما أعرفش بقى قصة أحمد عبد الغني دي كانت تمويه، ولا هو كان مصاب بـ جد، لكن تحامل على نفسه، إنما هو لاعب مهم ومحوري، وهو هداف الفريق التاريخي في أفريقيا، وواحد من أفضل عشر هدافين لـ الأندية المصرية كلها في أفريقيا بـ 21 هدف، وهو رقم ضخم جدا.
شارك عبدالغني في المباراة، وسجل هدف التقدم (اللي هو التعادل في مجموع المباراتين) وفضلت النتيجة 1/ صفر حتى الدقيقة 90، لما عمرو الدالي سجل هدف المرور.
لكن برضه نقول: رغم إنه تاريخ صنداونز مع الأهلي معروف، لكن لا مانع من تذكر بعض الأمور:
أولا، بـ استثناء الخماسية الشهيرة، عمر صنداونز ما كسب الأهلي، لا بره ولا جوه، في عشر ماتشات قابلوا فيها بعض.
ثانيا، عمرهم ما اتقابلوا في مجموعة، دايما لقاءات إقصائية، يا أنا يا إنت، مفيهاش أنا وإنت، عكس المرة دي، اللي ممكن يتأهلوا سوا عادي.
ثالثا، صنداونز لم يسجل أي هدف في القاهرة (بـ أتكلم عن مواجهات الأهلي طبعا) مش بـ أقول ما كسبش، تؤ، لم يسجل أي هدف في أي مباراة هنا، والخمس ماتشات انتهوا كلهم بـ فوز الأهلي وكلين شيت: 2/ صفر تلات مرات، 1/ صفر مرة، 3/ صفر مرة.
رابعًا، بـ استثناء ماتش الخماسية، الأهلي دائما يسجل في جنوب إفريقيا، في كل الماتشات اللي لعبها هناك، غير الماتش بتاع لاسارتي دا، سجل على الأقل هدف.
خامسا، رغم تسجيل الأهلي في كل المواجهات هناك، إلا أنه عمره ما كسب، دايما تعادل، رغم أنه في تلات مناسبات الأهلي هو اللي يتقدم، بل إنه مرة اتقدم 2/ صفر، لكن مقدرش يحافظ على التقدم، وانتهى الأمر بـ التعادل.
سادسا، شباك صنداونزاستقبلت الهاتريك الوحيد في مباراة نهائية قارية، عبر تاريخ الأندية المصرية كلها في القارة السمراء، وعارفين طبعا إنه كان واجب من خالد بيبو، في واحدة من تلات ماتشات عمل بيهم كل اسمه وتاريخه.
أما عن مواجهات صنداونز مع الزمالك، فـ نكتفي بـ قولنا: "إن الله حليم ستار"