فانلة الطيران

الطلاينة جم زاروا مصر، أوه جم! 27 مايو 1964، على ملعب أرنست هابيل في فيينا، كان نهائي كأس أوروبا لـ الأندية (دوري الأبطال) بين ريال مدريد العريق وإنتر ميلانو الإيطالي (إنترناسيونالي)، وكان نهائي حساس، لـ إنه ريال مدريد لـ تالت مرة بـ تقابل نادي طلياني في النهائي، وكل مرة نادي مختلف، والمرتين اللي قبل كدا الريال كسب، بينما الإنتر يخوض أول نهائي له. والإنتر ساعتها كسب 3/1،  وبقى بطل أوروبا.
بعدها بـ سنة، إنتر ميلانو بـ يكرر الوصول لـ النهائي، والمرة دي يقابل بنفيكا البرتغالي في عزه، اللي كان حصد نسخة 1962، وبرضه الإنتر يكسب 1/صفر، ويبقى بطل أوروبا لـ المرة التانية على التوالي، ثم في سبتمبر يلعب كاس الكونتينتال (كأس العالم لـ الأندية حاليا) قصاد الإندبنتنت الأرجنتيني، ويكسبه رايح 3/صفر، وجي تعادل سلبي، ويبقى "بطل العالم".
ساعتها كانت بـ تتقال "بطل أوروبا وبطل العالم"، لازم أوروبا الأول عشان دي مهمة خد بالك، بطل أوروبا أهم من بطل العالم، وأوروبا نفسها أكبر من العالم.
بطل أوروبا وبطل العالم دا، مش يصح برضه نجيبه يلعب ماتش ولا حاجة، زي ما قبلنا قبله ريال مدريد وبرشلونة وبنفيكا؟ واجب برضه.
ساعتها تصدى لـ هذه المهمة نادي الزمالك، اللي كان بـ يعيش أزهى أيامه، وإذا كان إنترناسيونالي دا بطل أوروبا مرتين ورا بعض، فـ الزمالك بطل الدوري المصري مرتين ورا بعض، ومحدش أحسن من حد، وكمان هـ نجيب أحسن حكم في العالم، هولندي اسمه هورن، والماتش هـ يبقى أحسن حاجة من كل حاجة.
جه نادي إنترناسيونالي، في يوم أشبه بـ الأعياد، مع أمنيات بـ إنه يتكرر إنجاز الأهلي لما غلب بنفيكا بعد فوزه بـ بطولة أوروبا 1962، وإن كان فيه قلق من لاعب اشتراه نادي إنترنانسيونالي من نادي روما، اسمه ممفرديني، يقال دفعوا فيه 300 ألف جنيه، مش عارف إذا جنيه مصري ولا إسترليني، بس أهو جنيه، ودا رقم وقتها كنا نسمع عنه في الأحلام بس، مش كـ أسعار لاعبين، لأ، الرقم نفسه في أي حاجة يخض.
المهم، قلا الماتش بـ شوية بسيطة، الزمالك اتفاجئ إنه الضيوف جايين لابسين تي شيرتات بيضا، وهم ما كانوش عاملين حسابهم، هم افتكروا إنه الضيوف عارفين تي شيرت الزمالك أبيض، فـ أكيد يعني مش هـ ييجوا بـ نفس اللون.
تعمل إيه يا عبرحيم؟ تعمل إيه يا عبرحيم، روح يا ابني استلف لنا طقم من نادي الطيران، وفعلا استلفوا الفانلات من هناك، وكابتن لطيف يقول: الزمالك بـ الفانلة الغامقة بتاعة الطيران، ومحدش فاهم هو "الطيران" له فانلات معينة، لـ إنه مش واضح إنه المقصود نادي الطيران. 
المهم، الزمالك بدأ الماتش بـ تشكيل: شاهين جون، يكن حسين ، محمود أبو رجيلة، سمير قطب، أحمد مصطفى، أحمد رفعت، الجوهري الصغير ، عمر النور، علي محسن، حمادة إمام، أحمد عفت، وقدموا ماتش مش بطال، وكانوا آخر حماس، بس الإنتر كسب تلاتة واحد، وهدف الزمالك سجله علي بكر.
ثواني بس!
علي بكر مش مكتوب في التشكيل!
أيون ما هو نزل كـ بديل هو وحسام وصفي، أبو أحمد حسام ميدو.