لو جوزك خانك هتعملي إيه؟.. والبنات تجيب
“عمرى ما هطلب الطلاق من جوزي حتى لو خانني، ولو خانني هبقى أنا السبب، ليه الست تاخد موبايل جوزها وتفتش فيه؟ ده الدين قال ”يا أيها الذين آمنوا لا تسألوا عن أشياء إن تبد لكم تسؤكم”".. بتلك الكلمات تصدرت الفنانة وفاء عامر تريند محرك البحث العالمي “جوجل” بعد تصريحاتها المثيرة للجدل حول حبها لزوجها في برنامج حكايتي مع الإعلامي عمرو أديب.
وسأل موقع “الدستور”، عدد من الفتيات "لو جوزك خانك هتعملي ايه؟" وكانت الإجابات كالتالي.
قالت مي محمود: “أنا لو جوزي خاني مش هستنى على ذمته ساعة واحدة، أصل ليه يخوني؟ ليه ابقى أنا بعمل كل حاجة وهو يخوني ويجي عليا ويجرح مشاعري وكرامتي”.
فيما قالت ندى هاشم: “ لا أنا عندي يموت ولا إنه يخوني، الموت أحسن من الخيانة، على أقل هيبقى لوحده في القبر وربنا هيجبلي حقي منه”.
أما ليندا العربي كان لها رأي أخر فقالت: “مع السلامة عايز يخوني مع ألف ألف سلامة هو اللي هيندم مش أنا، أنا وقتها ابقى مرتاحة البال جدًا عشان هبقى عارفة إنى عملت اللي عليا بزيادة أوي عشان أرضيه ويبقى معايا وفى الآخر سابني ومشي”.
وأجابت منى محمد: “الخيانة بتوجع أوي ما أظنش إن في ست عندها ذرة كرامة هتقبل تعيش يوم واحد مع رجل خانها حتى لو الخيانة دي كانت مجرد شات وكلام من ورا شاشة على مواقع تواصل اجتماعي مجرد التفكير في واحدة تانية بس ده خيانة حتى لو ممثلة عجبته في التلفزيون ومجرد إنه جه في باله إنها أحلى دي برضه خيانة، الخيانة مش سرير بس لا في خيانة بالإحساس والمشاعر وبتوجع برضه، فكرة إن كلمة حلوة واحدة ممكن تتقال لست تانية غيري بتقتل مش بتوجع بس”.
أما رد ياسمين البهلي فكان: “أنا اتخطبت مرتين وفي المرتين اتخانت وحسيت بالإحساس ده واقدر أقول بكل بساطة إنه سكاكين بتمزق في القلب والروح الخيانة والغدر شئ موجع جدًا فكرة إن أدي لحد أمان وهو يغدر بيا فكرة قاتلة وموحشة متصورش ابدًا إن في حد عنده شئ من الإنسانية ممكن يغدر بست ويقولها إنه بيحبها وفي الآخر يجي له نفس يقول كلام حلو لواحدة تانية بيقدر ينام وهو راضٍ عن نفسه إزاى بس أنا متاكدة وعارفة إن الحياة داين تدان”.
