منى زكي: «حاولت أطفش أحمد حلمي في الأول»
حلت النجمة منى زكي، ضيفة على برنامج “صاحبة السعادة”، والذي تقدمه الفنانة إسعاد يونس، ويذاع على قناة Dmc، وتحدثت منى زكي خلال الحلقة عن قصة حب وزواجها من الفنان أحمد حلمي ورأيه في مسلسلها الأخير.
وقالت منى: كنت مرة في مكتب المنتج محمد فوزى، وكنا هنعمل مسرحية بطولة عامر منيب، وقالى ان في دور عنده بيفكر يجيب فيه أحمد حلمى وكان وقتها بيعمل برنامج لعب عيال وأنا كنت بتابع البرنامج ده بس مكنتش عارفة وشه لأنه بيظهر بضهره".
وأضافت: "قلت للمنتج محمد فوزى يا ريت ده حد لذيذ أوى وأنا بينى وبين نفسى عاوزة أشوف وشه، ولما جه المكتب سلم بطريقة غريبة كده وبعدين جاله تليفون وأنا ومحمد فوزى دخلنا البلكونة بنتكلم وقلتله لا ده طلع رخم أوى ومش لذيذ زى البرنامج، وقلتله جربه أنا مش عارفة، ووقتها كنت بقول عليه انه رخم اوى على الحقيقة".
وتابعت منى: "بدأنا بروفات وبدأت أشوفه لذيذ، وهو تقريبا حس إني همشي من المسرحية وكنت فعلا وقتها هاعتذر، وقال ناخد أرقام بعض، وبقينا بنتكلم في التليفون وبقينا أصحاب جدا وعرفته كمان على أصحابي المقربين".
واستطردت: "هو حاول كتير يلفت نظري في أكتر من موقف ولكن أنا ولا أي حاجة بتتهز جوايا، يمكن لأن حب والدى الرهيب واهتمامه بيا والعطاء اللى عمله ليا خلانى مش أي حركة شاب يعملها أنه يأثر فيا لأنى واخدة حب كبير أوى من والدي".
وأكملت منى: "في مرة سألنى عيد ميلادى إمتى وسألته ليه فقالي عادي، فقلتله، قالي إيه ده وأنا كمان نفس يوم 18 نوفمبر، وأنا بيني وبين نفسي إيه الجو القديم ده وقلت يا سم مكنتش مصدقاه، بس طلع صادق فعلا وطلع نفس يوم ميلادي، وقالى بحبك وسيبته وروحت مع أصحابي، ولما سافرت فضل الموضوع في بالي".
وزادت: "بدأت أراجع صفات كتير في أحمد حلمى ولقيت عنده نبل وعمرى ما شفت فنان بالشكل ده عنده رقى وطيبة في التعامل مش عادى وعنده تسامح يفوق أى حد قابلته، فشفت إنه شخص من جوا حاجة جميلة جدا ومثقف جدا ومتفتح، ولقيت نفسى بعد كده مش هقدر أعيش من غيره، وكل لما نتكلم أكتر يبدأ حاجات تنمو جوايا تجاهه".
وتابعت أن والدها رفض فى البداية ارتباطها بأحمد حلمي ولكنها اقنعته حينما سألها هل هذا هو الشخص الذي تتمناه وسوف يسعدها فقالت نعم، وحاول والدها التضييق على أحمد حلمي لتطفيشه ولكنه وجده في النهاية شخص طيب.
وأضافت منى: والدي كان يتعامل معي ومع أحمد حلمي، مثل عادل إمام في عريس من جهة أمنية.
وقالت إنها شعرت بالخوف الشديد من مشهد المحكمة في مسلسل "لعبة نيوتن" والذي عرض خلال شهر رمضان الماضي نظرا لصعوبة حفظها للمشاهد الطويلة.
وروت منى، خلال لقائها بصاحبة السعادة كواليس مسلسل “لعبة نيوتن” الذى حقق نجاحا كبيرا في موسم رمضان الماضي، وقالت إنها تحمست لدورها في مسلسل "لعبة نيوتن" بعد قراءتها للسيناريو وإعجابها بشخصية "هناء" التي تجسدها في المسلسل.
وأردفت: "كان بقالي 4 سنين قاعدة في البيت بيجيلي شغل مش أحلى حاجة ولكني مش متحمسة له، لحد ما عرض عليا المخرج تامر مرسي، لعبة نيوتن وأنا بحب أعمل مع مخرجين لهم رؤية، وأنا كان نفسي أعمل مع محمد ممدوح".
واضافت "أنا صعبة الحفظ، ومشهد المحاكمة كان أربع صفحات، حسيت بضربات قلبي بتزيد وكلمت المخرج تامر محسن وقولتله إزاي هحفظ كل ده، وقالي خدي وقت، وربنا أراد ينجدني وقولت المشهد من أول شوت بدون ولا غلطة".
وتابعت أن شخصية هنا التي جسدتها في المسلسل ليست غبية ولكنها بريئة وتسعى لإثبات ذكائها وقوتها نتيجة عدم ثقتها في نفسها ورغبتها في الحصول على دعم من المحيطين بها، لافتًا إلى أن مشهد الولادة في المسلسل كان من أصعب المشاهد لتصويره على مراحل متفرقة على مدار شهور طويلة.
رأى أحمد حلمي في مسلسل لعبة نيوتن
وعن رد فعل زوجها الفنان أحمد حلمي من مسلسل لعبة نيوتن، قالت منى زكي: "مبحبش اتفرج على نفسي، ولكن دي أول مرة اتفرج على نفسي لما اتعرض المسلسل، لأن أحمد غصب عليا وقالي اتفرجي عليه لايف في نفس اللحظة مع الجمهور، ورد فعله إن في حاجة حلوة بتحصل وساعات كانت بتعجبه حاجات".
مسلسل "لعبة نيوتن"، وعرض في سباق دراما رمضان الماضى، ومن بطولة كل من: محمد فراج، محمد ممدوح، سيد رجب، عائشة بن أحمد، مايان السيد، أسامة الهادي، ولأول مرة في الدراما المصرية الممثل المصري الأمريكي آدم الشرقاوي، سيناريو وإشراف على الكتابة مها الوزير، وتضم ورشة السيناريو والحوار الكُتّاب: مها الوزير، سمر عبد الناصر، محمد الشخيبي وعمّار صبري، من إنتاج شركة Media Hub (سعدي - جوهر)، تأليف وإخراج تامر محسن.
تدور قصة مسلسل "لعبة نيوتن" حول رحلة حازم وهنا، اللذين يخططان في سرية تامة لإنجاب طفلهما بالأراضي الأمريكية، ولكن المغامرة تتعقد شيئًا فشيئًا، وتأخذهما إلى عوالم لم تكن يومًا في الحسبان، وقد تم تصوير أحداث المسلسل في مصر والولايات المتحدة الأمريكية، وهو رابع الأعمال التليفزيونية للمخرج تامر محسن في دراما رمضان.
