مستعينة بـ دينا الشربينى فى إعلان القرار.. ريهام سعيد تعتزل الإعلام وتتجه للتمثيل
كشفت الإعلامية ريهام سعيد عن اعتزالها العمل الإعلامي بشكل نهائي والاتجاه للتمثيل والتركيز فيه بصرف النظر عن سنها.
وقالت «سعيد»، في منشور لها عبر حسابها الرسمي على موقع تبادل الصور والفيديوهات الشهير "انستجرام": "فكرت كتير قبل ما اكتب البوست ده.. أنا اعتزلت التمثيل سنه ٢٠١٥ لأني حسيت إن صاحب بالين كداب، وإن التمثيل مأثر على مسيرة الخير اللي ابتديتها من سنين طويلة عشان الوقت والمجهود اللي بعمله لكن عشقي للتمثيل إللي هو دراستي ومهنتي الأولى قبل الإعلام، رجعت أمثل تاني وأنا لسه في نظر المخرجين والمنتجين مذيعة عايزه تمثل".
وأضافت:"كنت عارفة إن عشان أخد مكان كممثلة لازم أسيب الإعلام زي مع حفظ الألقاب داليا البحيري وبسمة ودينا فؤاد ودينا الشربيني وغيرهن، بس مكنتش قادرة أسيب رسالتي اللي كانت مهمة أوي وقتها أنا حصلي مشاكل كتير من المهنة دي بتأثير باطل من السوشيال ميديا من منافسين وأعداء بسبب المشاهدة العالية جدًا والنجاح أنا تعبت و حسه إني قدمت كل إللي ممكن يتقدم والدولة عاملة إللى عليها، ومش محتاجين دور المجتمع المدني في مساعدة الناس".
وتابعت "أنا ليا الشرف أن اشتغلت في المهنة العظيمة دي اللي ليها رسالة سامية وعظيمة، وليا الشرف إني كنت إعلامية في أصعب وقت مر على الإعلاميين أيام حكم الإخوان، والحمد لله كان لينا موقف واضح ومتغيرش ولا دقيقة".
وأوضحت:"أنا الحمد لله حققت في التمثيل و كل اللي اشتغلته علم مع الناس واشتغلت أعمال كلها قيمة بس بعد ما جالي السكر وشوية مشاكل تانية قررت أعمل اللي بحبه، أنا بكل أسف بعلن اعتزالي الإعلام تمامًا وهركز كممثلة، وهطلب من الدكتور أشرف زكي إنه يساعدني إني أغير الفكرة الموجودة في أذهان المخرجين والمنتجين إني مذيعة".
وأكملت:"ورسالة للأستاذة كاملة أبو ذكري، ومش مكسوفة نفسي أوي أمثل معاكي حتي لو مشهد ده من أحلامي، خطوة صعبة وفيها ريسك كبير بس على الأقل أجري ورا حلمي حتي وأنا في السن ده".
وأنهت حديثها:"جه الوقت إني استمتع باللي بعمله وبحبه خصوصًا لما يكون في عصر ولا في وسطة ولا محسوبية، واللي هيجتهد هيوصل، متسيبوش حلمكم مهما فات الوقت".
