تامر حسنى عن كليب «بحبك» مع حلا شيحة: مضيتى عليه بنفسك وتقاضيتى أجره كاملًا
علق النجم تامر حسني على الأزمة التي أثارتها الفنانة حلا شيحة، بسبب كليب "بحبك" التي تشاركه بطولته، وكتب عبر صفحته الخاصة على موقع التواصل الاجتماعي «فيسبوك»، قائلًا: "نهاركم جميل يا أغلى الناس.. الحقيقة عمري ما بتخيل إني أدخل في نقاش بالشكل دا مع زميل بحترمه، وكان في بينا كل خير".
وشرح موقفه قائلًا: "للتوضيح، بما إنك يا حلا كتبتي بوست وأشركتي الجمهور الكريم معانا بدل ما كنتي تكلميني شخصيًا ونتناقش بيني وبينك، فا أنا مضطر أرد هنا برضو".
وتابع: "أولاً أنا عمري ما وعدتك إن الكليب مش هينزل.. دا محصلش أصلاً يا حلا.. مش أنا خالص اللي أوعد وأخلف، الحقيقة إني احترمت كلامي معاكي ووعدتك أشيل مشاهد تانية طلبتيها وشيلتها بالفعل.. وشكرتيني عليها، ولو حابة تفتكري المشاهد اللي اتشالت بعد إذنك روحي شوفيها في المونتاچ عند الأستاذ عمرو عاكف أو كلميه يبعتهالك كلها موجود".
وأضاف تامر: "وبعدين الفيلم بقاله ٣ أسابيع في السينمات والكليب موجود جوه الفيلم، هو بالنسبالك الحرام إننا ننزل الكليب على اليوتيوب بس إنما الكليب يتشاف جوه السينمات عادي؟ منطق غريب فعلاً يا حلا، و بعدين هو مش انتي اللي مضيتي عقد وتقاضيتي عليه مبلغ كبيرعشان الدور دا بعينه؟ هو مش إنتي اللي صورتيه ومثلتيه بنفسك وبمنتهى الرضا ولّا حد أجبرك؟".
وتابع تامر: "للتوضيح للجمهور الكريم أنا والمخرجة الأستاذه ساره وفيق بعتنالك وكنا بنتحايل عليكي تيجي تشوفي شغلك قبل إصدار الفيلم، عشان لو عندك أي ملحوظة تقوليها، ماكنتيش بتردي علينا وتليفوناتك كلها كانت بتقفل في وشنا، إنتي للأسف يا حلا متعاملتيش صح مع الموقف كان لازم تهتمي بأمرك أكتر من كدا، ولو كان ليكي أي طلب تاني كنت هعمله بكل حب، إنما إنتي فجأة اختفيتي ومكملتيش تركيب صوتك في الفيلم ولا جيتي تتصوري عشان أفيش الفيلم أصلًا، ومخليتيناش نعرف نعمل أفيش مجمعـ وبقيتي تقفلي تليفوناتك وتكنسلي علينا كلنا، وبعدين أي فيلم بيبقى ليه خطة مسبقة في الدعاية وانتي عارفاها كويس ووافقتي عليها، ودا كليب رومانسي يعني معقول كنتي عايزة المنتج يشيل كل مشاهدك اللي صورتيها من الكليب ويطلعني بغني وبقول الكلام الرومانسي دا للأستاذ ماجد الكدواني مثلاً، هو دا يُعقل؟".
وأضاف تامر: "أنا زعلان منك جداً يا حلا على مفردات البوست بتاعك غير الموفقة، ومستحيل هرد بطريقتك اللي فيها تجريح واتهامات باطلة ليا احتراماً لحاجات كتير يمكن فايتاكي بس مش هتفوتني، وعلى فكرة أنا واثق إنك عارفة إنى مستاهلش منك كدا، وهكتفي بالتوضيح دا وربنا يهدي الجميع ويكتبلك كل الخير اللهم آمين".
بداية الأزمة
يذكر أن الفنانة حلا شيحة فاجأت الجمهور بالتبرؤ من فيلمها الأخير "مش أنا"، الذي قدمته بمشاركة الفنان تامر حسني، ويتم عرضه حاليًا، وهاجمت تامر لنزول كليب جديد ظهرت فيه بصورة رومانسية، ودعته للتوبة.
ونشرت حلا، عبر حسابها الرسمي على موقع الصور إنستجرام، منشورًا قالت فيه: "أنا اتفاجئت جدًا بنزول كليب يجمع فيه مشاهد متفرقة من الفيلم، خصوصا بعد آخر بوست نزلته ووضحت فيه أنا إيه.. واتفاجئت أكتر خصوصًا بعد وعد تامر حسني ليا وتأكيده أنه حیحترم رغبتي وبعض الطلبات اللي طلبتها منه بكل احترام وود الصيف اللي فات وأکدلي إنه حيحترم رغبتي".
وتابعت حلا شيحة، عبر منشورها: "إحنا يمكن نجحنا بمقاييس الدنيا بس صدقوني بمقایيس ربنا إحنا لم ولن ننجح، أنا عارفة ومتأكدة إن زملائي جواهم خير بس للأسف فتنة الشهرة والنجاح مش بتخلينا نشوف ونقيس الأمور صح، بتكلم من قلبي، الكليب ده ميرضيش ربنا وأنا عيطت لأني شفت نفسي في المشاهد دي.. دي كانت زلة نتيجة ظروف مريت بيها وكلنا بنغلط ولازم نغلط علشان إحنا بشر بس المصيبة إننا بنغفل وبننسی".
وأضافت "شيحة": "أنا مش حتكسف من حد.. أنا تبت من المشاهد دي، وهي لا تصح وأنا غلطت وبصلح وأهم حاجة إن ربنا يرضى عني لأن في الآخر ده اللي حينفعنا مش الشهرة ولا النجاح، لا هو مش نجاح أصلًا علشان النجاح الحقيقي حاجة تانية خالص إحنا أغلبنا ناسينها إلا القليلين منا، الفن لو بيخلينا نبعد عن منهج ربنا ومنبقاش قدوة لولادنا يبقى باطل وميبقاش فن".
واختتمت: "إحنا كلنا عندنا امتحان في الدنيا دي، وحابة أفكرك بالفيديو ده یا تامر اللي قولت فيه أنا مش بتمني أموت وأنا مطرب أنا دايما خايف کده.. كلام أكيد قولته في لحظة صدق جواك وجوانا كلنا، شوفه تاني يمكن يفكرك إن جواك أكيد في صراع، وأنا وكلنا كلنا بنغلط بس المهم في الآخر نتدارك الغلط و نصلح..(إلا من تاب وآمن وعمل عملًا صالحًا فأولئك يبدل الله سيئاتهم حسنات وكان الله غفورًا رحيمًا).. الله على كلام الله وجماله، يا سلام لو أصواتنا ومواهبنا كلها نستعملها في الخير عشان يبقى فن بجد".
كانت حلا شيحة أعلنت عن تبرُّئها من الفيلم الجديد ولم تحضر العروض الخاصة للعمل ولم تشارك في الحملة الترويجية له خلال الفترة الماضية، كما قامت بإلغاء متابعتها للفنان تامر حسني عبر حسابها الرسمي على موقع التواصل الاجتماعي إنستجرام.
