الأقدم

لما كنا صغيرين، اتربينا على المعلومة دي: نادي السكة الحديد هو أقدم الأندية في مصر والشرق الأوسط، حيث تأسس 1903 سابقا كل الأندية الجماهيرية إلخ إلخ.
إنما لما ندقق في الكلام دا نكتشف إنه مش صحيح على أي نحو من الأنحاء، يعني إحنا شفنا المقال اللي فات إنه نادي "سكارابيه" أقدم منه، اللي هو بقى بورفؤاد، ولو افترضنا إنه المقصود يعني "النادي اللي مازال محتفظ بـ اسمه وهيئته"، فـ دا كمان مش صحيح، لـ إنه ما نعرفه اليوم بـ نادي "السكة الحديد"، أنشئ تحت اسم نادي "الهوكي" بـ بولاق.
كمان لو حسبناها من ناحية إنه "مصري"، فـ هو ما كانش كذلك، هو تأسس أصلا لـ المهندسين اللي كانوا شغالين في ورش السكة الحديد، والمهندسين دول كانوا كلهم أجانب، وما كانش مسموح لـ المصريين بـ ارتياده.
صحيح، كل دا تغير مع الزمن: الاسم، الطبيعة، الأعضاء، النشاط الأساسي، لكن ما ينفعش يتغير بـ أثر رجعي، فـ تقول إنه نادي مصري، فضلا عن فكرة إنه الأقدم أو الأول، هو زيه زي أندية كتير في مصر، اتأسست في السنوات الأولى لـ القرن العشرين، وكانت كلها أندية أجنبية.
بعض الأندية دي ما عادش ليها أثر، بعضها اسمه اتغير، بعضها نشاطه اتغير، بعضها اتغير فيه كل حاجة، لكن ما ينفعش نتكلم عن نادي من دي بـ اعتباره الحالي، ونسحبه على بداية تكوينه.
الأندية دي لما بدأت تتكون خلت المصريين يفكروا في إنشاء أندية مصرية، ودا اللي حصل زي ما هـ نشوف بعد شوية، إنما لـ حد 1907، ما كانش فيه أي نادي مصري، ولا حتى نادي أجنبي وتحول إلى طابع مصري، كانت كلها أندية لـ الأجانب.
قبل 1907 دي، خلينا نبص بصة على إسكندرية، لـ إنه عندنا نادي أسسه شخص مصري سنة 1905، فـ البعض بـ يعتبره أول نادي "مصري"، وهو النادي الأوليمبي، أو اللي نعرفه حاليا بـ اسم النادي الأوليمبي.
قبل ما ناخد فكرة عنه، أحب أوضح بس، إننا مش بـ صدد لقب ولا جايزة، ولا هـ تفرق حاجة فكرة الأول والأقدم وكل هاتيك الأشياء، إحنا بس بـ نحاول نرسم صورة لـ البدايات، بـ التالي، اللي عايز يعتبر حاجة يعتبرها، حسب مفهومه ومعياره لـ الحكم على الأشياء.
النادي "الأوليمبي"، صحيح تأسس 1905، وصحيح اللي أسسه إنسان مصري هو علي مخلص الباجوري، إنما فيه حاجتين، الأولى إنه تأسس تحت اسم "رد ستار" أو "النجمة الحمرا"، وفضل كدا لـ حد سنة 1915، لما اسم اتغير بقى نادي "موظفي الحكومة"، وكان بـ يشارك بـ هذا الاسم، لـ حد ما اتغير سنة 1924 بقى النادي "الأوليمبي".
الحاجة التانية، إنه وقت تأسيسه، مش بس ما كانش متاح لـ المصريين، دا كمان كان قاصر على موظفي الجمارك تحديدا، فـ دا ما يخليهوش حتى نادي عام، فضلا عن وصفه بـ إنه مصري أو لأ.
لو الحاجتين دول مش فارقين معاك، كونه خاص وقاصر على مصلحة معينة، وإنه كان بـ اسم تاني، وهيئة تانية، تقدر تعتبره الأقدم، ولو إنه بـ الشكل دا يبقى كمان السكة الحديد وبورفؤاد في الاعتبار، بص، احسبها زي ما تحسبها، إنما في سنة 1907 بقى عندنا نادي، فيه كل المواصفات المطلوبة: مصري، عام، له اسم واحد ما اتغيرش عبر التاريخ، هو مين؟ بـ الظبط!