شيرين تواصل الدفاع عن زوجها: «فيز وتوكيلات إيه أنا كلي ملك حسام»
تواصل الفنانة شيرين عبدالوهاب الرد على الأزمة التي أثيرت مؤخرًا بعد انتشار تسجيلات صوتية لوالد زوجها حسين حبيب، وهو يتحدث بشكل غير لائق عن علاقة نجله المطرب حسام حبيب بشيرين.
وفي الجزء الأول من رد شيرين عبر تسجيل صوتي على "تويتر" قالت: "أحب أطمن كل الناس اللي بتحبني أنا بخير ومفيش أي خطر على حياتي، واللي حصل مش هينفع أرد عليه بكلمتين، لكن حسام جوزي اللي أنا معاشراه ده إنسان من أنضف رجال الدنيا وبيحبني أكتر من نفسي، وأنا مدياكم العذر عشان إنتو متعرفهوش، وهو ربنا بعته في طريقي في وقت صعب، وهو بيحبني أنا وبناتي أكتر من نفسه، وهو عايش يخاف عليا وعلي بناتي، ومعملش حاجة لنفسه، وحماتي الست اللي ربت راجل أخلاقه كده دي ست عظيمة، وبقولكم مفيش أي حاجه من دي خالص، وحسام نقي ونضيف".
أما في الجزء الثاني فردت علي الاتهامات التي وجهت لحسام حبيب بناء على تسجلات والده بأنه يستغلها ماديًا، قائلة: "مفيش توكيلات باسمه والفيز بتاعتي مش معاه، لأن أنا كلي ملكه وأنا جوزي بيتأثر بالكلام ده. فيز إيه وتوكيل إيه بس جوزي من عائلة محترمة ومقبلش حد يتكلم عليه كده، وحسام راجل مفيش منه خلاص وإحنا بقالنا أربع سنين مجوزين معملش أغنية واحدة كل الناس بتتخانق وتختلف ده طبيعي وأنا حاسة معاه بالأمان وكفاية إنه طلع كل الثعابين من حياتي والناس اللي كانت بتستغلني".
جاء ذلك بعد تداول عدد كبير من التسجيلات الصوتية والإسكرينات المنسوبة لوالد الفنان حسام حبيب الأستاذ حسين حبيب، وهو يتحدث عن شيرين عبدالوهاب بأسلوب غير لائق وعن نيته هو ونجله في أن يستوليا على أموال وحسابات الفنانة شيرين عبدالوهاب.
وبدأت أزمات شيرين عبدالوهاب وحسام حبيب، في يونيو عام 2020، بانتشار أخبار حول حدوث مشاجرة بينهما، وصلت إلى حد الضرب وتبادل السباب ولكن تدخل حسين حبيب لينفي هذه الشائعات وقتها ويؤكد عدم وقوع أي شجار بين نجله وشيرين، وأن الزوجين يعيشان باستقرار في منزلهما في 6 أكتوبر.
