ريا وسكينة الكرة المصرية

لـ التذكرة بس، إحنا هنا بـ نتتبع مسيرة الدوري، عشان نفكر مع بعض، ليه أرقام هدافي الدوري ضعيفة، ومحدش وصل لـ تسعين هدف في كل مسيرته، غير عشر لاعبين.
شفنا في المقال اللي فات لـ حد موسم 1961 – 1962، لما وصلنا موسم 1962 – 1963، كان موسم واعد، بـ فرص لـ لاعبين كتير، إنهم يحققوا أرقام كبيرة، ليه؟
من ناحية عدد المباريات زاد نسبيا، يعني، بعد ما كنا بـ نلعب 18 ماتش في الموسم، بقوا مبدئيا 22 ماتش، غير لو فيه ملاحق وماتشات فاصلة.
ثم إنه دوري المجموعتينبـ 12 نادي في كل مجموعة، خلى الأقرع وأبو شعر، يلعب في الدوري الممتاز، وظهرت أندية، ما تآخذونيش يعني، حصالات نقاط وأهداف: المنيا وبني سويف ودمنهور، والمنصورة ومالية كفر الزيات، وبترول السويس وهكذا وهكذا.
فعلا، أرقام الموسم دا واللي بعده(موسم 1963 – 1964) كانت مرتفعة بـ شكل ما حصلش تاني، وهـ أبقى أقول شوية أرقام من الموسمين دول، ليها العجب يعني.
لكن بعد الموسمين ما خلصوا، زي ما قلت لك قبل كدا، اتحاد الكورة رجع لم الموضوع، وخلى 12 نادي يهبطوا مرة واحدة، ورجعنا لـ 12 نادي كلاسيك، إنما برضه، مازلنا بـ نلعب عدد معقول من الماتشات، زائد إنه خلال الموسمين، كان فيه كم معقول من اللاعبين، حققوا أرقام فوق الجيد:
طه إسماعيل وحمادة إمام ومحمد بدويومحمد شاهين وعادل زين وعز الدين يعقوب، وحافظ غباشي ومحمود حسن وشحتة، وغيرهم وغيرهم.
إنما جت النكسة بقى، قصفت عمر اللاعبين في الملاعب، وأنهت مسيرتهم من غير إحم ولا دستور، واللي ما انتهاش عطل فترة لا بأس بها.
يعني حضرتك تخيلحمادة إمام مثلا، 75 هدف، ثم خمس مواسم ما يلعبش، لـ حد ما لعب له موسم بعد النكسة، خمس مواسم دول، ما كانش يقدر يسجل فيهم 25 هدف؟تقديري إنه كان يقدر يسجل ضعفهم.
عز الدين يعقوب، 86 هدف، من غير المواسم الخمسة العطلانة، عادل زين 80 هدف(بس دا مشكلته دوبل، القناة هبطت قبل النكسة أساسا)وهكذا وهكذا
فـ فيه على الأقل خمس ست لاعبين، من اللي لعبوا في الستينات، كان مؤكد يدخلوا نادي المائة، لو المواسم الملغية دي اتلعبت، غير لاعبين كانوا واعدين، حتى لو الأرقام اللي حققوها فعلا، شكلها مش كبير.
لـ ذلك يا إخواني، أنا مش بـ أقدر أمسك نفسي من الانبهار، بـ ما حققه الثنائي حسن الشاذلي ومصطفى رياض (ريا وسكينة الكرة المصرية) بـ الذات طبعا حسن الشاذلي.
الناس مش متصورين، قد إيه هم فارقين عمن قبلهم أو بعدهم، أنا ما شفتهمش بـ يلعبوا، لكن أرقامهم مش طبيعية.
يعني حضرتك، كل اللي لعبه حسن الشاذلي في حياته، 8 مواسم مكتملة
زائد بعض المباريات القليلة جدا، في 4 مواسم مختلفة، وخليني أقولهم لك بـ تفصيل شوية:
هو مواليد 1943، بدأ يشترك "أحيانا"، بداية من موسم 1959 – 1960، وهو عنده 17 سنة، لـ مدة تلات مواسم، ما عنديش إحصائية، لعب كام ماتش في التلات مواسم دول على بعض، إنما هم أكيد أقل من 10 ماتشات.
بداية اشتراكه بـ انتظام، لما كمل عشرين سنة، موسم 1962 – 1963، خمس بـ الظبط وحصلت النكسة، وعطل مع اللي عطلوا، ثم لعب بعد النكسة تلات مواسم، قبل ما يلعب 6 ماتشات، في موسم 1976 – 1977، اللي اعتزل في بدايته، ورجع في نهايته أنقد الترسانة.
يعني مجموع ما لعبه، أقل من تسع مواسم، سجل فيهم 173 هدف، تاني، 173 هدف في تسع مواسم، علما بـ إنه معظم هذه المواسم22 ماتش فقط، مش مشاركته هو 22 ماتش، الموسم كله على بعضه كدا.
عارف حضرتك حسام حسن لعب كام موسم مكتمل؟19 موسم غير الفكة، علما بـ إني بـ أعتبر حسام أسطورة، ولا أنكر إنجازاته كـ هداف، بس اللي مش قادر أتصوره، لو ما كانش فيه نكسة، والشاذلي لعب الست مواسم العطلانة، كان ممكن يوصل فين؟
دا غير إنه اعتزل لما زهق، هو كان يقدر يلعب له كمان موسمين تلاتة على الأقل، بس هو ما كانش مشغول بـ الأرقام، ولا يعرف سجل كام جون أساسا، فـ خلي الشاذلي ومصطفى رياض على جنب، دول مش مقياس لـ حاجة، وخلينا نشوف الدنيا مشيت إزاي بعدها. في مقال تاني