بعد وفاة هيثم أحمد زكي.. هوس الخوف من الموت فجأة يصيب الفنانات

أصابت وفاة الفنان الشاب هيثم أحمد زكي، الأوساط الفنية والشارع المصري بصدمة كبيرة كما سببت حالة من الهلع لدى النجمات من الموت بنفس الطريقة.

ومن النجمات اللاتي عانين من هوس الخوف من الموت فجأة الفنانة ياسمين غيث، والتي نشرت صورة لها من داخل المستشفى، عبر صفحتها الشخصية بموقع "إنستجرام"، وعلقت عليها قائلة: "أنا كويسة الحمد لله.. بس الحقيقة إن أنا النهاردة الصبح كنت حرفيًا بموت، صحيت على خبر وفاة هيثم أحمد زكي اللي أثر فيا ووجعلي قلبي قوي من غير ما عرفه زي غالبًا مصر كلها.. وأجبرت نفسي علي النوم تاني علشان مافكرش، وكانت دي النتيجة.. صحيت على وجع في صدري رهيب، وجع ناحية قلبي وفضل يزيد جامد قوي وضربات قلبي تعلي وتنزل في لحظة وقلت خلاص دي غالبًا يا جلطة يا heart attack في الطريق".

وأضافت: "كنت لوحدي في البيت.. وركزوا معايا في "لوحدي" دي، لحسن حظي كانت صحبتي جاية تاخدني وننزل، طلعت لي لقتني بموت حرفيًا وبقول لها "خوديني المستشفي حالًا أنا بيجيلي heart attack"، روحنا علي المستشفى ودخلنا الطوارئ وبدأوا الدكاترة يعملولي رسم قلب علي ضغط وسكر وكل الكلام ده.. النتيجة "كله طبيعي" وأنا بصرخ من الوجع وذراعي بينمل وبعيط وبفتكر كل اللي حصل لي في حياتي وبقول لهم "والنبي أنا خايفة، أنا مش عايزة أموت دلوقتي مش عايزة أسيب ابني".

وتابعت: "طلع عندي "panic attack" يعني " نوبة خوف" إدوني مهدآت لغاية ما نمت والدكتور قال لي إنتي متوترة من حاجة ودة اللي عمل فيكي كدة، لازم تهدي وتريحي....(و طبعًا لأني من وقت تعبي بقيت بترعب وبخاف أكتر من زمان بكتير فالخوف كان الضعف)......و الحمد لله جت بسيطة وربنا ستر عليا... بس بجد الإحساس كان مميت".

وأنهت كلامها قائلة: "بدأت أتخيل الغلبان ده "هيثم" اللي ممكن يكون حصل له حاجة شبه كده بس كان لوحده فمالاقاش اللي ينقذه ويوديه المستشفي وبدأت أفكر إن تاني ربنا بيحاول يوعظنا كلنا بحد محبوب من كل الناس، الوحدة وحشة قوي يا جماعة، كفاية نحكم على بعض من بعيد لبعيد، كفاية بعد وجفاء، كفاية كلام علي بعض، كفاية تشكيك في بعض، كفاية تناكة وقرف، كفاية كفاية... الدنيا بتخلص في لحظة ويا رب ما تخلصش بينا واحنا لوحدنا، ربنا يرحمك يا هيثم ويرحمنا جميعًا".

كما أعلنت الفنانة الشابة مريم الخشت، عن إصابتها بأزمة صحية هي الأخرى، ونشرت صورة لها عبر خاصية الأستوري بموقع "إنستجرام"، ووجهت نصيحة لمتابعيها قائلة: "أنا عمري ما بنزل صور من النوع ده، لكن عايزة أقول إن مهم أوي يكون في حد قريب منك أو ساكن جنبك عنده مفتاح بيتك، علشان لو تعبت وأنت لوحدك، ولو حسيت إنك مش كويس، كلم حد وعرفه إنك محتاج مساعدة، الموضوع بسيط وأنا زى الفل، بس دي حاجة مهمة أنا شخصيا مكنتش مقدراها".

يذكر أن الفنان الشاب هيثم أحمد زكي، رحل عن عالمنا بشكل مفاجئ بعد تعرضه لهبوط حاد في الدورة الدموية، وتوفي في منزله وحيدًا عن عمر يناهز الـ 35 عامًا.