الموضوع وما فيه عن قصة القرن وناديه

قبل ما تقرا، الهدف من كتابة الحلقات دى، مش إقناع حد بـ حاجة، إحنا بـ نحكى حكاية من حكايات الكورة.
نتبسط ونفهم ونستعيد التاريخ، وكل قرن وأنتو طيبين.
(1)
تبدأ قصتنا فى خمسينات القرن العشرين، لما الاتحاد الدولى لـ كرة القدم خد اتجاه وسياسة بـ توسيع دائرة التنافس، الكورة صناعة بـ تدور فى مليارات الدولارات، كل ما المنافسة بـ تتوسع، المهووسين بـ يلاقوا حاجات يتخانقوا عليها، والهوس بـ يزيد، وكل ما الهوس يزيد كل ما تدور فلوس أكتر.
توسيع دايرة المنافسة اللى بـ أقصدها هنا، يعنى الموضوع ما يقتصرش على نتيجة الماتش، أو حتى البطولة، وهكذا ظهر البالون دور مثلًا 1956، وبدأ يبقى فيه اهتمام بـ أحسن لاعب والهداف وأحسن فريق وأسرع هاتريك. وأكبر لاعب وأصغر لاعب، وغيره وغيره من الأمور الشبيهة لـ حد ما وصلنا نهاية التسعينات. الاتحاد الدولى شاف إن دا آخر عقد فى القرن، والكورة بدأت فى العالم من القرن 19، وبلاد كتير بدأت فيها المسابقات فى أواخر القرن الـ 19 وأوائل العشرين، فـ بدأ الاهتمام بـ تسمية «القرن»، نادى القرن ولاعب القرن، ومنتخب القرن وقرن القرن.
مهم هنا نقول إن اهتمام الفيفا ما كانش له أى صدى فى مصر وقتها، يعنى الفكرة نفسها ما كانتش موجودة، ما كانش مطروح سؤال مين «إيه» القرن، لا لاعب ولا نادى ولا أى حاجة. دا كان هناك بس.
الاتحاد الدولى بعت لـ الاتحادات القارية إفريقيا، آسيا، أوروبا.. إلخ إلخ يطلب منهم تسمية حاجات القرن فى كل قارة نادى القرن ومنتخب القرن.
نقول كمان الكلام دا كان أوائل التسعينات.
فـ إيه كان رد الاتحادات المختلفة على الفيفا؟
تعالى نشوف

(2)
الاتحاد الآسيوى لـ كرة القدم، هـ أبدأ بيه، لـ إنه خد أكتر رد فعل عاقل، الآسيويين رفضوا تمامًا تمامًا، تسمية نادى القرن فى آسيا، وأصدر الاتحاد عدة بيانات بـ هذا الشأن، مش بس كدا، دول كمان شددوا فى إنهم مش هـ يعترفوا ولا يعتبروا بـ تسمية نادى القرن من أى جهة أخرى.
ليه؟
لـ إنه بـ بساطة ما كانش فيه قرن عشان يبقاله نادى، الاتحاد الآسيوى تأسس 1954، يعنى عمره أقل من نص القرن، فـ إزاى يسمى نادى القرن؟
طبعًا كان فيه عوامل تانية أهمها عدم انتظام بطولات الأندية الآسيوية، يعنى أحيانًا كانت بـ تتلعب الشرق لـ وحده، والغرب لـ وحده، لما كانت إسرائيل بـ تشارك بـ اعتبارها فى آسيا، قبل ما تروح أوروبا وتريح الكل، أو إنهم يعملوا حاجات مجمعة أو أو أو فـ لـ ذلك يبدو عبثًا تسمية نادى القرن، لو كنت مسئول فى الاتحاد الإفريقى كنت هـ آخد نفس القرار، الاتحاد الإفريقى تأسس 1957 وبطولات الأندية من 1964 يعنى تلت القرن، إنما مش دا اللى حصل، فـ خلينا مع الاتحاد الآسيوى اللى قرر قرارًا قاطعًا رفض التسمية، بل إنه كما نرفض تزويد أى حد بـ سجلات تساعده فى اختيار اللقب. بس فيه خناقة على لقب نادى القرن فى آسيا،بين جمهور الهلال وجمهور الاتحاد فى السعودية، دى بقى جاى الكلام عنها.. تابعونا فى الحلقات اللى جاية.