مولاااااى

«أنا الآن فى الخامسة والسبعين
والتمثيل يجعلنى على الأقل أصغر بعشر سنوات
وإذا اعتزلت التمثيل
سأكبر عشر سنوات
فأكيد
سأختار أن أصبح فى الخامسة والستين
بدلًا من الخامسة والثمانين»
دا كان كلام زوزو نبيل لما وصلت سن 75، والجرايد نشرت إنها اعتزلت أواخر التمانينات.
بـ النسبة لـ جيلى، زوزو نبيل، تحديدًا، صوتها علامة من علامات شهر رمضان. هى كانت قدمت دور شهرزاد فى «ألف ليلة وليلة» بالإذاعة، ثم التليفزيون قرر يحول الحواديت لـ فيديو، وأخيرا فعلوا فى التليفزيون، لما قرروا يحافظوا على صوتها فى المقدمة والنهاية، فى أول «ألف ليلة» اتعرضت بطولة نجلاء فتحى وحسين فهمى سنة 1983.
فعلًا صوتها كان ساحرًا خصوصًا لما بـ تقول مولاى، وفضلت «ألف ليلة وليلة» علامة مميزة لـ الدراما طول التمانينيات، قدمتها بعد كدا شيريهان بـ حواديت كتيرة، وكانت زوزو نبيل بـ تلعب شخصيات فى المسلسل نفسه إلى جانب دور شهرزاد خصوصًا ريما مرات مشكاح.
زوزو نبيل اسم فنى، اختارته بناء على شروط أبوها وأمها إنها تمثل، ما تمثلش بـ اسمها ولا اسم العيلة، وتحلف إنها هـ تكون مثال الاستقامة، ومنبع الشرف، وهى حلفت طبعًا، وسيرتها بـ تقول إنه كان حلفان صادق، ولو إنه دا مالناش دعوة بيه.
المهم
اشتغلت الأول فى فرقة مختار حسين، ثم فرقة يوسف وهبى، ثم السينما من أول سنة 1937، وعملت أفلام كتير، يمكن أهمها على الإطلاق دورها فى الثلاثية، اللى هى كانت المقابل بتاع أمينة مرات سى السيد، لعبت دور مرات سى السيد الأولى قبل أمينة، واللى طلقها علشان رفضت تحكماته.
سيبك من إن حسن الإمام بوظ الشخصية والرواية والثلاثية، إنما أداؤها هى كان فوق الممتاز فى حدود المكتوب.
زوزو اتجوزت مرتين، الأولى من واحد اسمه سامى عاشور، وخلفت منه ولد سمته نبيل (اسمها الفنى)، ويقال إنها خلفته قبل ما تتعرف، وسمت نفسها على اسمه، لأنها اتجوزت صغيرة.
جوزها اتوفى، فـ هى حبت واحد تانى، كان وكيل وزارة، وكان متجوز بس هى كانت بـ تحب الاستقرار، فـ قدرت تقنع الراجل إنه يتجوزها، مش بس كدا، دا الراجل ومراته راحوا عاشوا مع زوزو فى بيتها، مش بس كدا، دى جوزت نبيل ابنها لـ بنت جوزها ومراته على أساس نبقى كلنا فى بيت واحد.
عاشت زوزو مع العيلة الكبيرة دى، وكانت صديقة ضرتها، والست حبتها، ودخل نبيل الكلية الحربية، فـ طلع ظابط فى الجيش، وخلف تلاتة، وراح فى أكتوبر 1973، هى اللى ابنها مات فى الحرب مش شريفة فاضل.
بـ مناسبة الاستقرار، زوزو حتى فى الشغل، كانت تحب تشتغل فى حاجات ثابتة، وطول الوقت ما كانش فيه أثبت من الدولة، فـ اشتغلت فى كل حاجة ممكن تشتغلها، وليها علاقة بـ الفن من قريب أو من بعيد.
اشتركت مع عبدالوارث عسر فى تدريس مادة الإلقاء فى معهد التمثيل، اشتغلت فى مناصب كتيرة بـ الإذاعة، اشتغلت رقيبة تلات سنين، مسكت إدارة المسرح الشعبى فى وزارة الثقافة، اشتغلت فى مؤسسة المسرح تلات سنين.
تعيينها الأساسى كان فى الثقافة الجماهيرية، ووصلت فى الدرجة الوظيفية لـ حد وكيل وزارة، لـ حد ما اتحالت على المعاش.
من ساعة ما فتح التليفزيون لـ حد سنة 1996 هـ تلاقى مسلسلات مشاركة فيها زوزو نبيل، يمكن كان آخرها يوميات ونيس، اللى كانت بـ تمثل فيه دور ماما زوزو، وكمان كانت بـ تشتغل فى السيما، ولما اتوفت كان فيه أكتر من عمل عملته ولسه ما اتعرضش.
ربنا يرحمها ويرحم الجميع.