عبد الفتاح العمدة.. مكتوبلك
مكتوبلك تبني وتعلّـي..
لكن بتعلّـي في غير دارك
تعشق وتضحي لكن غيرك
هو اللي يكمل مشوارك
مكتوبلك تتعب وتكافح
والحظ بيرفض يختارك
مكتوبلك تتعب وتفكر..
وتخونك فكرة في أفكارك
فـتهد الحلم اللي بنيته
وتسيبك غرقان في الوحدة
ليلك مش واصل لنهارك
مكتوبلك تحزن وتدمع
ويقول الناس دي
دموع تماسيح
وماحدش بيحس بوجعك
وإنك بتئن بقلب جريح
بدموعك كاتب أشعارك
مكتوبلك كل ما بتبعد
أوجاعك دايمًا بتسابق
خطواتك وبتسكن جارك
مكتوبلك تفضل وحداني
والحزن يلازمك في مسارك
تفتكر الغير بالخير دايمًا
والخير مـالغير عمره ما زارك
يأذوك وبتقبل أعذارهم
ولا حد بيقبل أعذارك
واكمنك أبيض من جوه
دايمًا تشاركهم في قرارك
وعشان نيتهم مش صافية
بيدبروا دايمًا لدمارك
وبترجع تسامحهم تاني
وتقول أهو يمكن يتعدلو
مع انك عارف طبيعتهم
الغدر بيهري فـ جتتهم
والمكر أساسي فـ نيتهم
ومناهم تخرب مملكتك
يتمنوا الشر فـ أخبارك
صحصح بقي وافهم حكايتهم
بكفاية تغرك براءتهم
لو كانوا ملايكة من الظاهر
في نفوسهم شياطين ومناهم
يجي يوم يشربو فيه من نارك.
