شاي بلبن - "هيبتا التغيير"

عاشق اعشقنى
كاره اكرهنى
لاكن ....اسمعنى
حاول تتغير
غير.... غيرنى من اول لمسه
من اول لمسه غيرلى سنينى
من اول لمسه غيرلى سنينى...
نسينى...
رسينى على اول مارسه

محمد منير
............................

علشان التغيير الي بيحصل في الشعب المصري هذه الايام
قلت لازم اتكلم عن التغيير وبدايه التجديد او الدخول في حاجه جديده
كل ده بيخلينا نمر بهيبتا.
هيبتا دي يعني رقم 7 باللغه الاغريقيه
هيبتا هنا بتساوي منحني ( كيبلر - روس ) ..
و.......
متيجو نشوف
اول حاجه بتقابلنا في هيبتا التغيير هي الصدمه ...
1\ الصدمه
انت حائر ..خايف ...متردد ...
اعمل كده ولا بلاش ..
متشكك في قرارك ..
ياتري اسيب المنطقه الامنه ولا اتغير علشان
الاقي فرصه احسن واكيد نتيجه تانيه غير الي بتجيلي
ياتري ارجع الميدان تاني ولا اكمل تحت جناح التغيير الي حصل
ياتري اسامح حسني مبارك بعد ان اخذ برائه ام اهاجمه بسبب
الفساد السياسي والاقتصادي والجتماعي و و و ...
انت هنا في مرحله الصدمه من التغيير
انت هنا عرضه لكل مخاوف العقل الباطن بتاع حضرتك
وعلشان كده بتدخل في تاني رقم من هيبتا
2\ الرفض
طبعا بطل المرحله هنا هو عقلك الباطن ومدي تحكمه في حضرتك
هنا هايبدا يجيبلك صوره الماضي الايجابيه بحلاوتها
حتي انك بتتسائل ...؟؟
امال فين الملل والاكتئاب وشويه الحاجات الي ماكنتش طايقها وخلتني اخد قرار التغيير .....؟؟
بتطلعلك صوره بطل حرب اكتوبر ومعاها صوره فساده
تطلعلك صوره اصحابك وهما بيموتو بين ايديك ومعاها صوره العدلي
مبسوط وهو بيستقبل حكم البرائه ...
طبعا في مخاوف بتظهر لكنها مخاوف من المستقبل
تكمل مع السيسي رئيسي ولا ترجع لمرسي ولا ترجع لمبارك نفسه
المستقبل مع مين ...؟؟
معاهم ولا مع غيرهم ..؟؟
عقلك الباطن خلاك بين المطرقه والسندان
جايبلك كل الصور الحلوه الي في ماضيك
وجايبلك كل المخاوف من المستقبل
واحيانا كوكتيل جميل
أووووووم حضرتك
ترفض
ولما ترفض تروح علي طول للمرحله التالته من هيبتا
3\ الغضب
حيره وعدم تنظيم وتردد وتشويش في الافكار
وتضاد في التصرفات تروح علطول الي الغضب
وتبدا تتنرفذ علي كل خلق الله
الدبانه تبقي مش طايقها
عايز تتخانق وخلاص ...
عايز تصرخ زي صرخات اصحابك في الميدان ايام 25 يناير
عايز تغضب وتمسك في زماره واحد فاسد فاسق دمر مستقبل مصر
عايز تصرخ من اعماق اعماق قلبك
عيش ...حريه ...عداله اجتماعيه ....
لكن ...
بتلاقي نفسك ساكت ...
حاطت ايدك فوق بوقّك وساكت ...؟؟
كل ده لان حضرتك بتتقسم لاتنين
واحد عايز يتغير فعلا
وواحد عايز يرجع ولا يتقدّم
واي حد بيتقسم اتنين اعرف علطول انه ها يكتأب
يعني هايدخل المرحله الرابعه من هيبتا التغيير
مرحله ...
4\ فقد الثقه بالذات والاكتئاب
هنا بقي ملعب العقل الباطن
هنا انت بتلعب مع بارشلونه .....
انت بتلاعب وزير مخابرات الفريق نفسه ...
هل انت تستطيع الوقوف امامه ..
للاسف ....
كل ماتفكر بالتغيير تلاقي 100 سبب مقنع
( لاحظ كلمه مقنع ) انك ماتتغيرشي ..
هاتبدا تردد كل الكلام السلبي الي عقلك الباطن قالهولك
( اكيد فعلا اصحابي ماماتوش ودام عيني بالرصاص الحي ّ ...؟؟
اكيد ان الدمّ الي سال علي جبيني كان اوهام ...
هما كانو الاف خلوهم عشرات ...
هاتفكر في السلبيات اكثر من الايجابيات
المرحله دي كتير جدا مش بيعدوها لانها فعلا مرحله صعبه
ده بارشلونه مش الزمالك ياخوانا..
ده وزير وفريق ورئيس عمداء الملاعب ...
علشان كده المرحله الرابعه بتبقي من اسوا المراحل وبتحس فيها
ان التغيير ده هو عدوّ جاي يقتلك ..
بل انت تتسائل ...
( هل حقا لم يقتلني ...؟؟)
لكن في ناس بتعدي المرحله دي
وبيعدوها ب3 حاجات محدش بيخرج منهم
الاولي \
الحافز
بيبقي عندهم حافز قوي علي التغيير...
مثلا حب كبير لبلد كبير
التاني\
الاراده
عندهم اراده قويه لاتستسلم للعقل الباطن ومخاوفه
اراده قامت بالتحدي واسقطت من هم اقوي واعتي الفاسدين
حتي ولو حكم لهم بالبرائه
التالت \
ليه لأ
كلمه بتتقال ببساطه وبعدها حط الي انت عايزه
ليه لا .... انا استطيع ان افعلها
ليه لا .... ماهي خاربانه خاربانه
ليه لا ... هو انا استفدت ايه من الي فات
ليه لأ...... منا عملتها في 25 يناير
ليه لا ..... منا وقفت ودافعت عن وطني يوم 28 يناير
ليه لا بتنقل حضرتك لمرحله جديده من هيبتا وهي مرحله

5\ التجريب والاختبار

بتبدا تاخد اول خطوه للتغيير ..
ممكن بالتخطيط ..
ممكن بالقرايه في الموضوع ...
ممكن بانك تنزل وتسال بنفسك ...
المرحله دي هي مرحله الحركه وعدم الجمود
انت هنا بتتحرّك لودّام
هنا انت تنزل الميدان وتتذكر وتتنسّم عبير النصر
انت هنا تبدا تعقل وتخطط وتستفيد مما حدث
وكده بتدخل علي الي بعده

6\ القرار

بدات تحط الخطط وتمشي علي قاعده الاحتمالات
لو حصل كذا هاعمل كذا
هنا مرحله العقل الواعي
هنا مرحله الايجابيات من العقل الباطن
هنا مرحله الجذب الهادئ المطمئن
هنا انت تتحرك لكن بثقه
هنا انت تعلمت مما حدث ولن تنزل الميدان دون تخطيط
هنا انت تعلم جيدا ادوات المرحله القادمه
هنا انت لن تجعل احد يستخدم كتفيك ليعلو عليها
وتبدا اخر مرحله من هيبتا التغيير
مرحله ..

7\ التوحد والقبول
وممكن بالبلدي نسميها مرحله عبده سيطره

فعلا انت هنا بتحسّ انك مسيطر علي كل حاجه
وعندك القدره علي القفذ مش الحركه وبسّ
هنا انت تستخدم فساد الاخرين لتدعيم موقفك
انت هنا تلعب بنفس ادوات خصمك ..
هنا الدهاء السياسي وليس الجفاء والهجاء السياسي
هنا انت تلعب بهدوء وتسيطر بهدوء

كده
هيبتا التغيير انتهت
وكلنا بنمر بالمراحل السبعه دي لكن الي بيختلف بيني
وبينك وبين الاخرين هو..
الزمن

مدّه بقائك في كل مرحله

نفس الكلام هنا ..
ياتري انت قاعد في انهي مرحله ...
ياتري عديت المرحله الرابعه ولا للخلف درّ
ياتري ماشي بسرعه ولا ماشي زيّ السلحفاء
ياتري قفذت من مرحله لمرحله لانك محتاج ودوافعك قويه
ياتري انت بتروح وتيجي كتير علي المراحل
اوعي تكون ماشي عكسي بسبب انك مصدق كلام الي حوليك
او مصدق كلام عن نفسك انك ماتقدرشي
الفرق هو الزمن ..
لكن مهما كان الزمن فانت ستتحرك لانك نويت ان تتغير
وستتغير للافضل ..
بالقوه بالدهاء بالدماء احيانا لكن ستتغير للافضل
مهما حاولو ان يهمشوك او يضعفوك او يستقطبوك
او حتي ....يبرّئوك
سنتغير ..
واخيرا ( غيّر ..... تتغيّر )
ودمتم بخير طالما هناك شبابا يرون الامل
.............
د\ لؤي عبد المنعم