عاجل.. "أقنعونى بعمل سحر وصورونى فى المقابر".. أقوال مؤمن زكريا فى تحقيقات النيابة (خاص)

حصلت "الدستور" على نص تحقيقات النيابة في القضية رقم 6904 لسنة 2024 جنح الخليفة، بشأن فبركة سحر لـ مؤمن زكريا، 36 سنة، لاعب كرة قدم سابق.

س: ما تفصيلات بلاغك؟

ج: اللي حصل أن لقيت واحد قريب زوجتي اسمه مصطفى كلمها، وقالها إن فيه واحد جارهم اسمه محمد قاله إن في ناس لقو عمل معمول لمؤمن في المقابر عشان كان العمل معمول على صور بتاعتي وكمان كان فيه عروسة مربوطة من إيديها ورجليها ودبابيس وكان عليها طلاسم وقالولي تعالى المقابر عشان تشوف العمل قالولي احنا كنا بنحفر عشان نزرع صبارة وهناك لما وصلت قابلت الناس اللي اتمسكو وكان معاهم واحد هرب وهناك وروني الحاجة في مية بملح والورق كان دايب في الميه وكان فيه صورتين واحدة كبيرة وواحدة صغيرة عليها طلاسم والعروسة كان مكتوب عليها طلاسم والورق كان محطوط في المية ودايب بعد كده أخدنا العروسة وبقيت الورق واتخلصنا منهم وهناك كان فيه واحد بيصور والموضوع ده هناك من وقت ما أنا دخلت المقابر واستأذنته أنه ميصورش ويمسح الصور ديه ومحدش ينزل حاجة ولا ينشر حاجة وبعد كده فوجئت بتداول الصور على مواقع التواصل الاجتماعي ونشر أخبار عني أثناء وجودي بالمقابر وهو ده كل اللي حصل.

س: كيف تصرفت عندما تم إبلاغك؟

ج: أنا روحت مقابر الإمام الشافعي يوم الأربعاء 25 سبتمبر الساعة 10 مساءً ويوم السبت اتفاجئت بالصور منشورة على مواقع التواصل الاجتماعي ويوم الأحد لقيت المذيعة ريهام سعيد بتتكلم في الموضوع ده وكانت مستضيفة اللي اسمه محمد عمر ونشر الفيديو اللي كان مصوره.

س: ما علاقتك بالمتهمين تحديدًا؟

ج: أنا معرفهومشي بس محمد إمام ده هو اللي جار قرايب مراتي وهو اللي تواصل مع مصطفى وكلم مراتي، وقالتلي على الموضوع.

س: ما هي بادرة لقائلك بالمتهمين؟

أنا رحت المقابر وقابلتهم يوم الأربعاء، 25 سبتمبر، وروحت لقيتهم مطلعين الحاجة اللي بيقولوا عليها أن معمولي عليها العمل والعروسة وحطين الورق في ميه بملح ولما روحت وروني فيديو للحاجة وهما بيطلعوها من المقابر علشان ابقى متأكد أنها فعلا كانت مدفونة في المقبرة.

س: ما هو دور كل منهم تحديدًا؟

ج: أنا لما رحت لقيت محمد عمر كان واقف بيصور الواقعة أثناء حضوري بالمقابر ودون علمي ولما اكتشفت التصوير طلبت منه يمسح الصور والفيديوهات اللي أخدها ومينشورهاش ولا يستخدمها ومطلبش مني أي حاجة وبعدها اكتشفت أنه نشرها على مواقع التواصل الاجتماعي وتمت استضافته في برنامج ريهام سعيد ونشرها دون علمي وموافقتي بقصد التربح المالي والحصول على أموال مقابل التشهير بي والتربي رمضان محمد هو اللي بلغني أنه لقى الحاجة مدفونة في المقابر وحطها بمية وملح وجيت لقيت الصور بتاعتي والعروسة مكتوب عليهم طلاسم والعروسة كانت مكتفة من الأيد والرجل وفيه ورقة كان عليها طلاسم بس كانت دايبة جوه الميه بقصد إيهامي بوجود عمل مدفون بالمقابر وباقي الناس كانت واقفة أثناء وجودي بالمقابر وابن التربي بس أنا مش عارف أسمه بالكامل.

س: بما تتهم المتهمين تحديدًا؟

ج: أنا بتهمهم كلهم بالنصب والتشهير بي على مواقع التواصل الاجتماعي عن طريق تكوين تشكيل عصابي، وكان قصدهم ينصبوا عليا وتحصيل مبالغ مالية من خلال تداول أخباري بمواقع التواصل الاجتماعي.

س: ما هي الطرق الاحتيالية التي قام المتهمون باستخدامها حيالك؟

ج: هما أقنعوني إني أنا معمولي عمل وطلبوا مني الحضور للمقابر وطلعوا قدامي صورتين ليا عليها طلاسم وعروسة مكتفة من الأيدي والأرجل عليها طلام وورقة بها طلاسم ذائبة داخل الماء، وقاموا بإذاعة ونشر الأخبار على مواقع التواصل والفيديوهات من خلال البرنامج بقصد التربح من مواقع التواصل الاجتماعي والبرامج مقابل نشر تلك الأخبار والصور والفيديوهات، وتم عمل تسجيلات صوتية من خلال مداخلات مع الصحفيين متواجدة ومذاعة على مواقع التواصل الاجتماعي، وتم نشر وإذاعة خبر على لسان المذيعة ريهام سعيد بقيام المتهمين بتصوير فيديو تم إخفاؤه بغرض بيعه مقابل خمسة ملايين جنيه، وذلك بخلاف ما تم نشره وإذاعته وتم نشرها.