عمرو وهبة: ولدت فى باريس وتزوجت فى 2010
كشف الفنان عمرو وهبة عن تفاصيل رحلته الدراسية، موضحاً أنه درس في الأزهر طوال عمره، منذ أن دخل الحضانة حتى تخرّج فى الجامعة.
وأشار وهبة، خلال حواره مع الإعلامية منى الشاذلي في برنامج "معكم منى الشاذلي"، على قناة cbc، أنه ولد في العاصمة الفرنسية باريس، وبعد ولادته بشهر عادت أسرته لمصر، وبعد سنوات بدأ تعليمه في الأزهر، وفي الثانوية العامة حصد المركز الرابع أدبي على مستوى محافظة بورسعيد، ليحصل في النهاية على ليسانس لغات وترجمة قسم ترجمة فورية.
وعن ذكريات زواجه، قال عمرو وهبة إنه تزوج في عام 2010، لكنه لم يقم بعمل حفل زفاف حتى يوفر نفقات السفر في شهر العسل، مضيفا: "اتفقنا أنا ومراتي هنعمل فرح وروحنا دفعنا عربون الحجز في مكان ما.. الفلوس اللي معانا يا نعمل فرح يا نسافر شهل العسل، فبعد ما دفعنا العربون قعدت أتكلم معاها، بس هي كان عندها الأحلام بتاعت البنات دي، الفستان ونتصور والكلام ده".
تابع: "قولتلها لو عايزة الصورتين هوديكي أقرب استديو ونتصور والفلوس دي نسافر بيها، يعني نسافر بيها إحنا أسبوع ولا الناس تيجي تاكل بيها في ساعتين، ومبيعجبهمش الأكل برضو!! فوافقت وسافرنا".
وأضاف عمرو وهبة: "كنا صغيرين وشكلنا صغير جدا.. والعمارة اللي كنا عايشين فيها كانوا فاكرينا اخوات.. البواب كان فاكر كده.. حتى الصنايعية اللى ألاقيه يقولي والنبي قول لأختك تعملنا كوباية شاي.. فخلاص مش هقعد أشرح لكل واحد، وبعدين فعلا شكلنا كان صغير جدا".
