«إحنا اللّى كنا فراخ»: الفنان سامح حسين يُبكى جمهوره فى «واحد من الناس»

سامح حسين من أشهر كوميديانات مصر، فبمجرد ظهوره على الشاشة ترتسم البسمة على الشفاة وتعلو وجهك الضحكات، لكن طلته هذه المرة أثارت الشجون والأحزان، ولأول مرة نرى كوميديان مصر في مشهد تراجيدي لكنه واقعي وهو يحكي عن ماضيه المؤلم، وأصعب لحظات حياته خلال حلوله ضيفًا على برنامج "واحد من الناس" الذي يقدمه عمرو الليثي.

عاش سامح في ظروف قاسية بدأت بانفصال والديه، وتحملت الأم مسئولية الأبناء كاملة بمفردها، لكنها كانت سيدة فقيرة، اضطرتها الحاجة إلى اللجوء إلى أقاربها لتطعم أولادها الصغار.

سامح حسين: أكلنا بقايا الأكل وكأننا فراخ 

قال سامح وهو يغالب دموعه: "والدتي كانت تروح لقرايبي تقولهم إحنا مربيين فراخ فيعطوها بقايا الأكل عشان الفراخ، لكن الحقيقة كنا إحنا الفراخ، عشنا فترة صعبة جدًا، من صغري بدأت أشتغل عشان أساعد أمي، بدأت في الإجازات، ثم بقى إجازات ومدرسة، وجامعة".

لماذا يحكى سامح حسين هذا الموقف التراجيدي؟ 

لم يرغب في إبكاء جمهوره، لكن الحديث هو ما جرّ سامح حسين لهذا الموقف، وهو يتحدث عن أهمية الزواج، وأنه يجب ألا يتزوج أحد وهو غير قادر على تحمل المسئولية، لأن النتيجة ستكون كارثية: "أنا بأحكي عشان لو أنا نموذج كويس الشباب يعملوا زيي، وأنا في الجامعة فقرات ظهري تعبتني، لأني اشتغلت فواعلي، كنت أشيل 3 آلاف طوبة، كل ده قبل استخدام المواتير، كنت اطلع الرمل والطوب لحد ما ظهري وجعني، خبطت على كل الأبواب، وعندي يقين إن ربنا هيطبطب عليا".

نصيحة للراغبين في الزواج ولا يحبون تحمل المسئولية 

وفي رسالة للشباب، قال الفنان الكوميدي في "واحد من الناس": "لو مش قادر على مسئولية الزوجة والأولاد، لأن فيه حقوق في رقبتنا ليوم الدين، لو مش قادر عليها متتجوزش، وربنا مدينا حلول كثير، الصبر، متدبسش ناس معاك، والدتي كانت صعبانة عليا لحد ما اشتد عودي، بدأت اشتغل بقيت الأب معاها".

وتحمل سامح حسين كل هذا الألم والمسئولية مع والدته ولم يفكر للحظة في التخلص من حياته وأوجاعها، لكنه فكر في الموت حين توفيت والدته بعد معاناتها 6 شهور مع مرض السرطان، وقال سامح: "وفاة والدتي هزتني أوي، 7 شهور بتمنّى الموت بعد ما ماتت، وقبل ما تموت فضلت 6 شهور مريضة بالسرطان وأنا قليل الحيلة، لفينا مستشفيات كتير، مكنش معايا فلوس، معاييش فلوس أجيب لها كيس دم، الدكتور قال لي آخر أيامها ومتوقع تتوفى خلال أسبوعين".

رسالة عتاب من سامح حسين لوالده المتوفي 

وعندما تحدث سامح حسين عن والده: "موعتش على والدي الله يرحمه، إلا وأنا كبير كانوا بيقولوا مسافر، وبعد كده رجع وردها، وبعدين انفصلوا وده سبب إن إخوتي أصغر مني بكثير".

لم يتمكن سامح حسين أن يغفر لوالده ما ارتكبه في حق أمه، قائلاً: "واخد على خاطري منه طبعًا".