عمر طاهر يطالب بإنصاف محمد فؤاد.. ما علاقة الرقم 60؟

نشر الكاتب عمر طاهر، منشورًا عبر حسابه على موقع التواصل الاجتماعي "فيسبوك"، يُطالب فيه بإنصاف الفنان محمد فؤاد على ما قدمه، بالتزامن مع بلوغ الأخير سن الـ60.

وكتب "طاهر": "بمناسبة وصول محمد فؤاد لسن 60 أعتقد دي مناسبة لزملائنا نقاد المزيكا الشاطرين إنهم ينصفوا تجربة فؤاد، وهي فعلًا متعبية كلام وأفكار.. سيب آخر كام عمل وهاته من الأول هتلاقيه في منطقته كان مغامر ومجدد وجرىء أكتر من منافسه الأشهر".

وتابع: "هو أول اللي اشتغلوا مع عصام عبدالله وياسر عبدالرحمن وفهد ومدحت الخولي وأحمد منيب ومودي الإمام، وهو اللي قدم وليد سعد، محمد رحيم، مصطفى عوض، عزيز الشافعي، تامر عاشور، الوحيد في جيله اللي كانت انطلاقة نجاحه من غير حميد الشاعري اشتغل معاه بعدين".

وواصل: "الوحيد في جيله اللي خاض تجربة جريئة ألبوم كامل مع أحمد الحجار. إزاي صوته وهو بيقول يا ليل بقى فاصل إذاعة الأغاني المصرية هو وماحدش غيره من جيله. مواضيع أغانيه ماوقفتش في حتة واحدة.. فيلمين مع مخرج كبير زي خيري بشارة وفيلم غير خريطة السينما مع هنيدي .. طلع من الفلكلور غنا وقدم تترات بقت تفصيلة في استماع الناس.. طبيعة نظرة الناس ليه وشكل الحتة اللي سكنوه فيها. تجربة مليانة كلام وكتابة وحاجات يتقدر تعبه فيها وحاجات فكت منه طبعًا زي أي حد. بس إجمالًا تجربة تستحق التقدير وتستحق إنها تتحط في مكانها بالضبط، وإن حد ينتشلها من منطقة اللطافة والقلش وكام عمل مش قد كدة مايلغوش اللي الراجل أنجزه بالفعل. كل سنة وإنت طيب يا فؤش".