ردت على هجوم الشاعر بهاء الدين محمد.. نص حوار «شيرين» مع جمهورها

تواصل النجمة شيرين عبدالوهاب التواصل مع جمهورها كل أسبوع، وذلك عبر خاصية طرح الأسئلة عليها من قبل خاصية "ستوري"، عبر حسابها الرسمي بموقع الصور والفيديوهات الشهير "إنستجرام".

وكشفت شيرين، خلال حوارها مع الجمهور، عن العديد من الكواليس والأخبار الجديدة ورأيها في هجوم الشاعر الغنائي بهاء الدين محمد الفترة الماضية، ويرصد "الدستور" نص حوار شيرين مع جمهورها في السطور التالية:

حسام حبيب في كلمة واحدة؟

سؤال صعب.

إيه رأيك في كلام الشاعر بهاء الدين محمد؟

والله أنا مش شايفة ليه أي مبرر.

ليه دايمًا الصحافة بتكون ضدك؟

 بالعكس أنا صحافة بلدي مصر وصحافة الوطن العربي كلهم ساهموا في نجاحي ودي الصحافة النظيفة، أما عن الصحافة الصفراء دي بقى حاجة تانية ممكن يكون تصريحاتي مش متذوقة فبتوصلكم عن طريقهم ومفهومها غلط.. وطبعًا إنتم شاهدين على اللي حصل وبيحصل مافيش مبررات بصراحة.

فكرة تلازمك منذ الطفولة وحتى الآن؟

عمل استعراضي كبير.

حبيتي في حياتك كام مرة؟

مرة واحدة بس.

ليه حفلات كتير اتلغت السنة اللي فاتت ؟

فيه ناس بتقول إنها متفقة معايا على حفلات وإني لغيتها وده كلام مش صحيح، فابتتلغي لعدم وجود اتفاق من الأساس.

لو قدامك فنانة من دول تعملي معاهم دويتو تختاري مين أصالة إليسا نجوى كرم؟ 

أنا كفنانة أتشرف إني أغني معاهم كلهم لأني بحترمهم وبحترم فنهم.

بتتواصلي مع هيفاء وهبي؟

 آخر مرة سألت عليها أيام انفجار مرفأ بيروت وكلمتها وماعرفتش أوصلها ساعتها.

ليه يا شيرين حفلاتك في مصر غالية إحنا كطلاب منقدرش ندفع 800 و1200 في تيكيت؟

عندك حق حبيبتي وإحنا بنشتغل نعمل حفلات أسعارها مناسبة للكل إن شاء الله قريب.

بحسك بتغيري من جيل الفنانات اللي بعدك "أصغر منك" مابتدعميش حد منهم خالص مع إن فيه أصوات جميلة؟

 بالعكس أنا طول عمري بقول إن إحنا عندنا أصوات مهمة جدًا في بلدنا زي ريهام عبدالحكيم ومي فاروق، وأصوات شابة واعدة جدًا زي ياسمين نيازي وكارمن سليمان وياسمين عزت ولارا إسكندر.

قولي جملة من أغنيتك الجديدة؟

 أنا، أنا، أنا...

ممكن تعيدي أغاني قديمة بصوتك تبقى من ضمن ألبوم زي ما عملتي في على إيدك؟

أوعدكم بده قريب.