14 نصيحة لطلاب الثانوية العامة قبل انطلاق الامتحانات: «موبايلك مع المراقب»
تنطلق امتحانات الثانوية العامة يوم الإثنين المقبل 20 يونيو الجاري بالمواد غير المضافة للمجموع على أن تبدأ المواد المضافة للمجموع يوم 26 من الشهر نفسه، وأنهت وزارة التربية والتعليم جميع الاستعدادات الخاصة بالامتحانات.
وفى هذا السياق، قدم معلمو الثانوية العامة عدة نصائح للطلاب قبل انطلاق الامتحانات وهى كالتالى:
_تدخل اللجنة تستلم كراس أسئلة وورقة إجابة بابل شيت.
_ كل فصل (لجنة) هيكون فيه أربع نماذج أسئلة للامتحان.
_ الأسئلة واحدة في النماذج الأربعة لكن ترتيبها متغير بينك وبين زميلك.
_ترتيب الإجابات هيكون مختلف بينك وبين زميلك يعني ترتيب الأسئة مختلف وترتيب الإجابات
_ هتلاقي رقم كود على ورقة الأسئلة اكتبه بالنص في ورقة البابل شيت من فوق.
_لازم يكون معاك قلم رصاص وقلم جاف ومسطرة وأستيكة (مساحة) وبراية.
_ هتستخدم القلم الرصاص في تظليل رقم الإجابة اللي انت شاكك فيها، وفي الآخر تبقى ترجع لها علشان تظللها بالقلم الجاف لما تتأكد منها.
_القلم الجاف هو الأساس في التظليل.. واتأكد إنك ظللت الدايرة كلها.
_ لو ظللت إجابة بالجاف وعايز تغيرها.. اكتب عليها علامة (إكس).. وبعدها اختار الإجابة الصح.
_ لو عملت (إكس) على الإجابة الغلط واخترت إجابة صح غيرها.. متقلقش.. هنا جهاز التصحيح الإلكتروني مش هيقول إنك اخترت إجابتين.. هنا هو هيصحح الدايرة اللي مش عليها إكس.
_ بلاش تظلل دايرتين في ورقة البابل شيت لنفس السؤال وتقول هما ياخدوا الإجابة الصح.. كده هتاخد صفر على السؤال ده.
_ من الضرورى أن تكتب اسم ورقم جلوس ولجنتك على ورقة الأسئلة وتكتب اسم ورقم جلوسك ولجنتك ورقم الكود في ورقة البابل شيت.
_ لا تحاول انك تغش ولا تطلب إجابة من الطالب الذى يوجد أمامك.
_ لو اتمسكت بموبايل حتى لو مقفول، هتتحسب عليك محاولة غش وهتسقط في المادة.. سيب موبايلك مع المراقب.
