يا سيد الرجالة
الحقيقة إن تبرير الرجالة الخيانة لنفسهم ده شىء عجيب جدًا.. ولما يتزنق يقولك أصل أنا طبيعتى كده، أنا راجل بحب الستات، أنا ربنا عشان عارفنى فمحللى ٤ وهيدينى ٧٢ حور عين.. والمجتمع يفضل يضغط على الست عشان تغير من شكلها، كل شوية تغير لون شعرها، تخس تتخن تنفخ تشد، وقوليله حاضر، ووطى صوتك، مترديش عليه أملًا منهم إنها تملا عينيه لكن من غير فايدة.. وهى مهما عملت مش هتعرف تغير ثقافة الراجل المصرى إلا من رحم ربى.
ويقولك أصل الستات دول زى الفاكهة، أنا بحب العنب وبحب المانجة، ليه تجبرونى على اختيار نوع بس من الفاكهة وأنا بحب كل الفاكهة وبحب أكلها.
وكأن الستات مخلوقة بس لمتعة الراجل منتهى المهانة والله.. والبنت أهلها يربوها ويعلموها ويجوزوها وتخلف وتربى وتنضف وتطبخ وتشترى طلبات وتذاكر للولاد وتودى تمارين وتودى للدكاترة، وتخرج وتفسح، وتتكلم مع ولادها عشان نفسيتهم وتساؤلاتهم، وتهتم بنفسها عشان جوزها لما يجى يلاقى السوبر وومان اللى شكلها لازم يكون واووو بعد كل المجهود ده.
وسيد الرجالة بقى بعد شغل كام ساعة يرجع يزعق ويشخط ويتأمر، عشان قرفان من الشغل والطريق، فالست طبعًا بعد كل اللى بتعمله فى البيت اسمها ست، وهى عندها قدرة الاستحمال الرهيبة دى، لكن الراجل لأ.. وبعدين يسمعها كلمتين ويتهمها بالتقصير وينزل يكمل يومه على القهوة، وعايز يرجع وش الفجر يلاقيها جهزاله، ماهى سوبر وومان من غير بطارية وضمان مدى الحياة.
ويقولك أصل الست ربنا عارف إن قدرة استحمالها عالية، عشان كده خلاها هى اللى تحمل وتربى، لكن الراجل مبيستحملش شكة الدبوس يا حرام!
طب معلش أنت دورك إيه؟
أنا بصرف بس، طب ولو مصرفتش أو مكفتش بيتك؟
الله الست واجبها إنها تستحمل جوزها وإلا متبقاش ست أصيلة، وواجب كمان تنزل تشتغل وتساعده فى المصاريف.
طب الراجل هيساعدها فى البيت؟
تؤ تؤ شغل البيت ده شغل الستات.
طب أنا هتجوز عشان ده حقى الشرعى وعشان أعرف أتجوز ما أنا لازم أدور على عروسة، فهتعرّف على دى ودى، وأهزر هنا شوية، وأخرج مع دى ودى، لحد ما ألاقى اللى على مزاجى.. ولو الست زعلت تبقى نكدية، إيه النكد ده تزعلى من حقى الشرعى! بدل ما تيجى تخطبيلى وتساعدينى كمان فى فرش شقتى التانية.. طيب لو رفضت؟ تبقى ناشز!
والمستفز إنه يقولك لو طلبت الطلاق تبقى مش هتعتب باب الجنة، ماهو أصل التعدد مش سبب شرعى عشان تطلب الطلاق.. طب أنا هتجوز من غير ما أعرفك، ما أصل ربنا محللى إنى أكذب عليكى وده من باب المودة والرحمة، عشان متزعليش فمش هعرفك.. نفسى أفهم إيه كمية التشوه اللى دخلت مجتمعنا وخلت الست فى أدنى مرتبة بالشكل ده.. عدد حالات الطلاق فى مصر بقى رهيب، وحقيقى ومن غير أى تحيز، بس لو دورت بجد هتلاقى السبب سيد الرجالة.. الراجل اللى حقيقى بقى بيفتقر لأبسط مبادئ المودة والرحمة.
الراجل اللى شايف إن مرتبته أعلى، بدليل إن ربنا مديله القوامة، وفهم كده إن القوامة معناها إنه يتحكم ويبقى الآمر الناهى فى البيت، والست تقول حاضر وعنيها فى الأرض وبس.. ولو فكرت بس تعبر عن حقها ورأيها، إيه ده إنتى نسوية؟ أيوه عارفكوا ياللى بتخربوا البيوت انتوا.. أيوه أيوه إنتى عايزة تبقى متحررة وتمشى على حل شعرك. وتبتدى سلسلة من الاتهامات غير المنطقية، وتلاقى نفسها دخلت فى جدالات صفرية ملهاش أول من آخر.
الست قدامها عمر على عمرها؛ عشان تعرف تثبت فى مجتمعنا إنها إنسانة والله.. ليها حقوق زيها زى الراجل، وعندها طاقة بتخلص وبتتشحن، وبتقابل مواقف ممكن تخلى روحها فى مناخيرها طول الوقت، ومع ذلك بتعرف تحترم اللى قدامها، ومش ماشية تناكف خلق الله زى سيد الرجالة!
