تزوّج عرفيًا من «متزوجة».. أنجب منها وباع ابنه بـ2000 جنيه
«أمه بتاخد استروكس ومتجوزة عليا»، بهذه الكلمات، بدأ المتهم ببيع ابنه في سرد أقواله أمام النيابة عقب القبض عليه، كاشفا تفاصيل قضية شغلت الرأي العام مؤخرا، مضيفا أنه قبل بـ2000 جنيه في رضيعه، بمنطقة منشأة ناصر بمحافظة القاهرة.
وقف المتهم "أحمد. ف،20 سنة، سائق ميكروباص، أمام النيابة العامة راويا تفاصيل حادثة مؤلمة مستطردا بقوله: "اللي حصل إني كنت متعرف على واحدة اسمها (رحمة) في إسكندرية من حوالی سنتين ونص تقريبا، وعاشرتها معاشرة الأزواج سنتين وكتبت عقد عرفي بيني وبينها بعد ما اتعرفت عليها بأسبوعين، واللي كنت أعرفه عنها إنها كانت متجوزة واتطلقت، وبعد سنة وشهرين من معرفتها حملت وفي الشهر التاسع خدتها ونزلت بيها على القاهرة وساعتها أقنعت أهلي إنها تقعد معايا ومع والدتي في ميدان الجيش بالظاهر، وبعدها ولدت طفل ذكر سمتيه (على) بس معرفتش أسجله علشان اكتشفت إنها متجوزة ومطلقتش من جوزها".
أكمل المتهم اعترافاته بالقول: "في الوقت ده حصلت مشاكل بين (رحمة) وأختها وجت الحكومة أخدتها هي وابني وسلمتها لقسم الظاهر، وبعدها جوزها أخدها من هناك علشان يطلقها، بس قعدها عنده 3 شهور، وفي الفترة دى أنا سافرت السويس أدور على شغل ورجعت وعرفت إنها بقت ماشية على حل شعرها وبتشرب استروكس والواد بيوقع منها في الشارع، فأخدته منها وقولت أدور على حد يشتريه علشان أنا مش هعرف أربيه".
تابع: "اتكلمت في الموضوع ده مع (أحمد) جاري، قالي إخويا ومراته مبيخلفوش وعايزين طفل يربوه ويراعوه، واشترط إني أمضى إقرار تنازل عن الطفل، وقالي هخليك تشوفه، أهدن 2000 جنيه، وأخبرني بعدها إنهم سجلوه وعشت حیاتي طبیعي، وبعدها بـ5 شهور تم القبض عليا، وهناك لقيت (جيراني)، سألوني عن الطفل وعن باقي المتهمين، حكيتلهم اللي حصل".
وأوضح بسؤاله عن رد فعله عقب اكتشافه زواج زوجته بآخر: "خليتها ترفع قضية خلع على جوزها وهو محبوس في قضية سرقة، وأخدتها ورجعت عند أمي في البيت هي والطفل، وقعدنا عند أمي وبعد ما جوزها خرج من السجن واكتشف إنها رافعة قضية خلع سلط عليها أختها تجيبها من عندي".
