يسرا تنعى رجاء الجداوي باكية: حسيت إن أمي ماتت تاني

نعت الفنانة يسرا، وفاة الفنانة القديرة رجاء الجداوي، قائلة: "طيبة وحنونة، النهاردة حسيت إن أمي ماتت تاني".

وبكت يسرا، خلال مداخلة هاتفية مع الإعلامي عمرو أديب، في برنامج "الحكاية" المُذاع عبر فضائية "إم بي سي مصر"، وهي تقول: "آخر مرة كلمتها وهي في العزل، قالت لي يا رب يا حبيبتي متشوفيش اللي أنا شايفاه، وكلمتها لحد في يوم رفعت السماعة كانت بتنهج، قلت لها اقفلي، كتر خيرها إنها خلتني أسمع صوتها".

وأضافت يسرا: "مهما اديناها مش كفاية، وبقول لأميرة بنتها شدي حيلك أمك كانت عظيمة، وكل اللي ادتهولنا هنحاول نرده".

وأردفت يسرا: "رجاء كانت جميلة جمال، قالت لي لما تحب حد اديله كل حاجة، اديتنا كل حاجة، عمرها ما بخلت بمشاعرها ولا عطائها ولا اهتمامها، كانت شقيانة وبتتعب وبتشتغل لآخر وقت في عمرها، أهم حاجة عندها أميرة وحفيدتها".

واستطردت: "رجاء مسابتنيش أيام تعب أمي، مسابونيش ثانية هي ودلال، عملنا لها ختمة من يوم ما دخلت المستشفى لحد النهاردة، دلال كل يوم توزع علينا مين هيقرأ لها أنهو جزء، ووصلنا لـ32 ختمة".