أحمد فلوكس: ليا 20 ألف جنيه عند السبكى وعمرى ماهشتغل معاه تانى
رفض الفنان أحمد فلوكس، ما أثير حول رفض النجم محمد رمضان ضمه لأعماله السينمائية والدرامية، قائلًا: «أنا ما بشتغلش مع أي حد، أنا اللي بنقي اللي بشتغل معاهم، ماحدش يجبرني أشتغل مع حد، أنا بعد عادل إمام ومحمود عبدالعزيز مابتكلمش على نجوم، محمد رمضان صاحبي واشتغلنا في أكتر من مسلسل عمري ما اتغريت على حد، التمثيل شغلانة "الأنا"، وهو ده اللى اتعلمته من أبويا، شاركت كممثل كومبارس فى أغنية الدنيا مجنونة وخدت 50 جنيهًا».
وتابع «فلوكس»، خلال برنامج «شيخ الحارة»، مع إيناس الدغيدى على «القاهرة والناس»: مش ندمان على فيلم 30 يوم في العز مع السبكى، فأنا كنت محتاج أشتغله جدًا؛ لأنه بيميل للطبقة الشعبية ودي طبقة أنا بحبها رغم أننا من أسرة أرستقراطية، ولكن مش هشتغل مع السبكي تاني، هو منتج جميل محترم وبيحب الفن وطيب، لكن عندي خلاف معه أنه لا ينفذ اتفاقياته، مابيدفعش أصلًا، وباقي لي 20 ألف جنيه عنده».
وحول تقديمه شخصية أنور وجدي في مسلسل «أنا قلبي دليلي»، قال فلوكس: «كان ممكن أمثل أنور وجدي بشكل أفضل من كده رغم أني راضي عن أدائي، فأنا اعتمدت على أفلامه فقط، كان ذكي لكن عصبي جدًا».
وحول سؤاله عن نجم مصر حاليًا، قال فلوكس: «السقا مدرسة كلنا جرينا وراها، أما عز لما اشتغلت معه في الممر لقيته بيشتغل على نفسه بشكل مش طبيعي وبيحترم كل الناس، أما أمير تعب جدًا في حياته وأخد السلم من تحت، وأعرفه من أيام الجامعة».
