ماندو العدل: سامح عبد العزيز طلب مني استكمال تصوير "أرض النفاق"
أعلن المخرج ماندو العدل، انتهاء تصوير مسلسله الجديد "أرض النفاق" للفنان محمد هنيدي، والذي يعرض هذه الأيام، ويشارك في ماراثون رمضان الحالي.
وكتب العدل، عبر حسابه بموقع "فيسبوك"، العديد من النقاط التي أوضحها للجمهور حول العمل.
ـ مسلسل أرض النفاق ده أصعب امتحان عدى عليا في حياتي لأسباب كتير وهي:
١- بكمل مكان مخرج كبير.. صاحبي سامح عبد العزيز وهو اللي طلب إني أكمل مكانه ودي مسئولية.
٢- أول مرة في حياتي أعمل مسلسل من غير ما اختار أي عنصر.. سواء فنانين أو فنيين.. ودي حاجة المخرجين اللي بجد يفهموا هي صعبة قد ايه.. بس اتبسط معاهم جدا واتشرفت بيهم جميعا.
٣- بعمل مسلسل كوميدي لأول مرة ومش أي مسلسل كوميدي.. ده أرض النفاق.. الرواية اللي اتعمل منها واحد من أعظم الأفلام في تاريخ السينما المصرية.
٤- الفيلم إخراج أستاذ فطين عبد الوهاب وده شيء مرعب في حد ذاته.
٥- مسئول عن نجم أنا بعشقه وعنده جمهور بالملايين في مصر والوطن العربي زي محمد هنيدي.
-٦ عدم عرض المسلسل على القنوات المصرية.
٧- وأخيرًا وليس آخرًا.. عايز أشرف أبويا وأعمل عمل يليق باسمه ومكانته.
واختتم كلامه قائلأً: "الحمد لله ربنا كرمنا أخر كرم رغم كل الظروف دي والمسلسل نجح نجاح كبير جدا، وشكرًا لكل الناس اللي تعبت في المسلسل من أكبر واحد لأصغر واحد، فركش أرض النفاق".
