الحق غير المستحق
تسمعوا عن الحق المكتسب؟ طيب عارفين ترجمته إيه بالإنجليزى؟ الترجمة الحرفية هى Acquired Right، بس ليه مش بتتقال عليه لما يوصفوا المصطلح ده؟ المصطلح المستخدم للحق المكتسب بالإنجليزية For Granted ومعناه الحرفى «أمر مُسلم به»، يعنى من الآخر «مفيش فايدة».
عارفين لما واحد ينزل كل يوم الصبح ويطلع ٥ جنيه يديها للشحات اللى على أول الشارع ويستمر فى الموضوع ده أسابيع؟ ويجى يوم يعدى على الشحات وينسى، أو ببساطة مش معاه فكة، الشحات ممكن ينظر له نظرة عتاب تشعره بذنب كبير جدًا وأذى نفسى ويشعر بأنه غلطان فى حق الشحات.
هى دى الدايرة اللى بتحصل فى حياتنا، بنسمح بتصرفاتنا مع اللى حوالينا إنهم يسرقوا مننا حق ويصبح مع الوقت «حق مكتسب».
دايرة بنضع نفسنا فيها من غير قصد، فيها كلمات هى اللى بتضعنا فى الدايرة دى أولها «العشم» ويليها «الإنسانية»، وحتى «العطاء» يدخلنا فيها وتخيلوإ إيه كمان بيحبسنا جواها «الحياء»!
طبعًا أنا مش عايزة أطفى النور وأقفل الدايرة ونتحبس فيها كلنا.. ببساطة مفيش مشكلة من غير حل، بس إيه الحل؟ نوقف العطاء والمساعدة وتقدير الظروف؟ بالطبع لأ.. فيه مثل بيقول.. ItTakes Twofor Tango يعنى رقصة التانجو تحتاج طرفين، والعلاقات الإنسانية دايمًا بين طرفين.
نبدأ إزاى؟
نبدأ إننا نحسن النية ونعطى بس مش زيادة ومانجيش على نفسنا حتى لا نشعر بالذنب.. وعلينا معرفة أن طرف المعطى لازم يضع الحدود لأن اللى بياخد معندوش حدود، ومن الطرف الآخر مطلوب منه حاجة بسيطة جدًا وهى «التقدير» والتقدير المعنوى مش هيكلفه حاجة.
نظرة تأملية لأى علاقة؛ اخرج بره الدايرة واتفرج على نفسك وعلى الطرف الآخر، وكأنك بتتفرج على مشهد فى فيلم، احكم وشوف هل إنت اللى مسروق حقك؟ وفكر إزاى بالتدريج تشرح وتغير الحدود والوضع، ولّا إنت اللى سرقت واكتسبت الحق ده؟ فعليك إنك تقدره وتحسسه بالخير والمودة اللى بيعملها وساعتها هتفضل تاخد حاجة بس مش مسروقة منه.
اعرف إنك يوم لما تقرر التنازل عن حقوقك ولو على سبيل المجاملة أو مراعاة ظروف أو أشخاص، أو بنية الحياء أو الإنسانية، بتكون بداية دايرة هتمر فيها بإنك أولًا: هتتكسف تطلب حقوقك بعدها، ثانيًا: هتشعر بتأنيب ضمير إنك بتطلبها، ثالثًا: هتتسول حقوقك، وهتوصل إنك رابعًا: هتبطل تطالب بيها عشان مسببة لك ضغط نفسى .. وكل ده والطرف الآخر أخدك حق مكتسب من أول يوم وكمان مش مقدر ومش عارف إنه بيسرق منك الحق ده «بإرادتك».. الحق المكتسب ليس خطأ مكتسبه ولكنه خطأ المتنازل عنه.
