عايدة رياض تكشف تفاصيل الـ100 دولار المزورة

كشفت الفنانة عايدة رياض، عن سر الـ100 دولار التي جعلتها تدخل السجن، قائلة: «الحقيقة إن الفلوس اتزقت عليا، وربنا العالم بيا».

وأضافت عايدة، خلال حوارها مع الإعلامي محمد موسى، ببرنامج «خط أحمر» المذاع على فضائية «الحدث اليوم»: «جم 4 لمحرم فؤاد وقالوله على الـ100 دولار المزورة، قالهم إزاي وهي مش بتخرج».

وتابعت: «محرم فؤاد نزل معاهم وهو ميعرفش حاجة، وبعدها بدأت التحقيقات، ومحرم فؤاد عمل خناقة كبيرة، ووقتها الجرايد كلها كتبت».

وكشفت الفنانة عايدة رياض سبب طلاقها من محرم فؤاد، قائلة: «كان وقتها مسلسل المال والبنون وقتها، وكنت بنزل طول اليوم وبرجع متأخر جدًا، وكنت بخاف منه لأنه يخض وله شخصيته».

وتابعت: «قالي هو ده بانسيون ولا إيه، وبدأت الخلافات وبقيت بين نارين، وحصلت خلافات كتير لدرجة إني نزلت بشنطة هدومي وروحت التصوير بيها».

واستكملت: «طول ما كنت بمثل، محرم فؤاد كانت بيتضايق، كان خايف عليا، وهو كان عنده حق، تركيبته كانت إن مراته متشتغلش.. محرم فؤاد معملش فيا حاجة وحشة، ولكن كان بيتعب نفسيًا من التمثيل، وسيبت محرم علشان شغلي».

علقت الفنانة عايدة رياض، على الشائعات التي تطلق عليها، قائلة: «شائعة الوفاة دي حاجة بسيطة من اللي بيحصلي».

وأضافت: «شوفت صورة حد حاطط صورتي وعاملي عمرة، وحد باسمي رادد عليه، وأنا أصلًا مسيحية ومش عندي فيسبوك، وتحدثت وقتها مع أشرف زكي».

واستكملت الفنانة عايدة رياض، قائلة: «بعدها زهقت وبقول إللي عايز يصدق يصدق وربنا أعلم بكل شيء».